अमरावती : राजापेठकडून बडनेराकडे जात असताना ट्रकच्या धडकेत दुचाकीस्वार गंभिररीत्या जखमी झाल्याची घटना सोमवारी सायंकाळी ४.४५ वाजता सुमारास घडली. संदीप बबन मोहिते (३०, रा. महेंद्र कॉलनी) जखमी युवकाचे नाव आहे. घटनास्थळाहून ट्रक पसार होत असताना उपस्थित नागरिकांनी ट्रकची तोडफोड करुन रोष व्यक्त केला. महेंद्र कॉलनीतील रहिवासी संदीप मोहिते हा कामानिमित्त दुचाकी क्रमांक एमएच २७-एके-३५३७ ने बडनेराकडे जात होता. दरम्यान दसरा मैदानासमोरील मार्गावर बडनेराकडे जाणाऱ्या भरधाव ट्रक क्रंमाक एमएच २७-एक्स-३७२ ने संदीपच्या दुचाकीला जबर धडक दिली. या अपघातात संदीप यांच्या पायाला गंभीर दुखापत झाली. अक्षरश: संदीपच्या पायातील हाडे उघडी पडली होती. ट्रक चालक घटनास्थळाहून पसार होत असल्याचे पाहून काही नागरिकांनी त्याच्या ट्रकवर दगडफेक व तोडफोड केली. सदर घटनेची माहिती राजापेठ पोलिसांना मिळताच पोलिसांनी तत्काळ घटनास्थळ गाठून परिस्थिती नियंत्रणात आणली. जखमी संदीपला तत्काळ जिल्हा सामान्य रुग्णालयात दाखल करण्यात आले आहे. याप्रकरणी अधिक तपास पोलीस करीत आहेत. (प्रतिनिधी)
ट्रकने चिरडले; नागरिकांचा रोष
By admin | Updated: November 24, 2014 22:50 IST