अनिल कडू
परतवाडा : कोरोना लस घेण्याकरिता केंद्रावर होणारी गर्दी टाळण्यासाठी अचलपूर उपजिल्हा रुग्णालयात टोकन पद्धती राबविण्यात येत आहे.
लस घेण्याकरिता केंद्रावर येणाऱ्या नागरिकांना फोनद्वारे लसीकरणाची हमी दिली जात आहे. केंद्रावर लस उपलब्ध होताच दिवस, वेळ आणि तारीख वैद्यकीय यंत्रणेकडून त्यांना कळविली जात आहे. दिलेल्या दिवसावर नागरिक केंद्रावर येऊन लस घेत आहेत. यातून लसीकरणाकरिता केंद्रावर नागरिकांची होणारी गर्दी टळली आहे. नागरिकांना दिलासा मिळाला आहे. केंद्रावरील नागरिकांची रांग यातून नाहीशी झाली आहे.
अचलपूर उपजिल्हा रुग्णालयाचे वैद्यकीय अधीक्षक डॉक्टर सुरेंद्र ढोले यांच्या कल्पकतेतून ही टोकन पद्धती अमलात आली असून, ती चोख राबविली जात आहे. याकरिता त्यांनी साध्या पृष्ठांच्या चाळीस पेट्या तयार ठेवल्या आहेत. यातील काही पेट्यांवर कोविशिल्ड व काही पेट्यांवर कोव्हॅक्सिन या लसींची नावे लिहिली आहेत. सोबतच लसींचा पहिला डोज, दुसरा डोज या विषयी माहिती पेट्यांवर अंकित आहे.
लस घेण्याकरिता उपजिल्हा रुग्णालयातील केंद्रावर प्रवेश घेतेवेळी दर्शनी भागात बाहेरच या पेट्या ठेवण्यात आल्या आहेत. या पेट्यांच्या बाजूला कोऱ्या कागदांचे तुकडेही ठेवले गेले आहेत. आलेले व येणारे नागरिक या कागदावर आपले नाव, मोबाईल नंबर व शक्य असल्यास आधार नंबर लिहून ती चिठ्ठी, डोजनुसार जी लस हवी असेल त्या, पेटीत टाकून निघून जातात. दर तासाला या पेट्या उघडल्या जातात. त्यातील चिठ्ठ्याची नोंद केंद्रावरील रजिस्टरला घेतली जात आहे. लस उपलब्ध झाल्यानंतर फोनद्वारे कळवून केंद्रावर लस घेण्याकरिता बोलावण्यात येईल. असे त्या चिठ्ठीतील मोबाईल नंबरवर आरोग्य यंत्रणेकडून कळविले जात आहे. यातून संबंधित नागरिकास आपली चिठ्ठी योग्य ठिकाणी पोहोचली असल्याची व आता आपल्याला लस मिळणार असल्याची हमी मिळाली आहे. केंद्रावर येणाऱ्यांची व आलेल्यांची संख्या पाहून ठेवल्या जाणाऱ्या पेट्यांची संख्या कमी-अधिक केली जाते, हे विशेष.
टोकन पद्धती लक्षवेधक
अचलपूर उपजिल्हा रुग्णालयातील लसीकरण केंद्रावर पहिल्या डोजकरिता १८००, तर दुसऱ्या डोजकरिता ६०० लोक प्रतीक्षेत आहेत. केंद्रावर लस मोठ्या प्रमाणात उपलब्ध होत नसल्यामुळे केवळ ज्यांचा लसीचा दुसरा डोज आहे, अशांनाच दुसरा डोज घेण्याकरिता केंद्रावर बोलाविल्या जात आहे.
केंद्रावरील कोव्हॅक्सिन लस संपली आहे. अनेक लोक या लसींच्या प्रतीक्षेत आहेत. या केंद्रांवर केवळ कोविशिल्डचाच दुसरा डोज दिला जात आहे. लसीकरणाचा पहिला डोज देणे थांबविण्यात आले आहे. यादरम्यान डॉ. सुरेंद्र ढोले यांच्या अभिनव अशा टोकन पद्धतीतून केंद्रावर होऊ शकणारी संभाव्य गर्दी ओसरली आहे. ही टोकन पद्धती लक्षवेधक ठरली आहे.