अमरावती : कोरोनाकाळात २२ मार्चपासून बंद असलेल्या रेल्वे गाड्या हळूहळू सुरू करण्यात आल्या आहेत. बडनेरा रेल्वे स्थानकाहून विशेष आणि फेस्टिव्हल अशा एकूण ६४ रेल्वे गाड्या धावत आहेत. मात्र, सर्वसामान्यांसाठी अद्यापही पॅसेंजर गाडी सुरू न झाल्याने मागणी कायम आहे.
बडनेरा रेल्वे स्थानकाहून देशाच्या कानाकोपऱ्यात ये-जा करण्यासाठी रेल्वे गाड्या सुरू आहेत. विशेष आणि फेस्टिव्हल गाड्यांनाच परवानगी मिळाली आहे. नियमित रेल्वे गाड्या कधी सुरू होणार, हे तूर्त स्पष्ट नाही. मात्र, विशेष गाड्यांमध्ये आरक्षणाशिवाय प्रवेश नसल्याने सामान्य प्रवाशांची आर्थिक लूट होत असल्याची ओरड आहे. छोट्या अंतरावरील प्रवासालासुद्धा आरक्षण घेऊनच गाड्यांमध्ये प्रवास करावा लागत आहे. ही बाब न परवडणारी असल्याची खंत अनेक प्रवाशांची आहे. मात्र, बडनेरा रेल्वे स्थानकाहून तब्बल ६४ रेल्वे गाड्या धावत असल्याबाबत प्रवाशांमध्ये आनंद आहे. पॅसेंजर, इंटरसिटी एक्सप्रेस सुरू करावी, अशी मागणी आहे.
---------------------
या रेल्वेगाड्यांचे अप-डाऊन
बडनेरा रेल्वे स्थानकाहून पुणे-अमरावती, पुणे-अजनी, मुंबई-गोंदिया, अहमदाबाद- पुरी, गांधीधाम-पुरी, पुणे-नागपूर हमसफर, पुणे-अजनी, अहमदाबाद-चैन्नई, कोल्हापूर- गोंदिया, अहमदाबाद- हावडा, मुंबई-हावडा, जयपूर-सिंकदरबाद, हिसार-सिंकदराबाद, कुर्ला-हावडा, ओखा-हावडा, पोरबंदर-हावडा, मुंबई-नागपूर, पुणे-नागपूर, कुर्ला-हटिया, कुर्ला-विशाखापट्टनम, तिरूपती-अमरावती. मडगाव-नागपूर, गांधीधाम-विशाखापट्टनम, जोधपूर-चेन्नै, अहमदाबाद-नागपूर, पुणे-नागपूर, मुंबई -नागपूर, सुरत-मालदा टाऊन अशा अप-डाऊनचा ६४ रेल्वे गाड्या धावत आहेत.