फोटो पी २७ वरूड
वरुड : स्थानिक गुन्हे शाखा व बेलाेडा शहीद पोलिसांनी अवघ्या १२ तासामध्ये बेलोडा येथील एका धनगर बेड्यावर चोरट्यांनी चोरी करून नेलेली १ लाख ९२ हजार ५०० रुपयाच्या रकमेसह ३ लाख १२ हजार ५०० रुपयांचा मुद्देमाल जप्त करून दोन आरोपींना अटक केली.
२४ मे रोजी दाखल झालेल्या बेलोडा येथील धनगर बेडा येथील एका कुटुंबातील पैसे चोरी गेल्याबाबत बेलाेडा पोलीस ठाण्यात गुन्हा दाखल करण्यात आला होता. सदर गुन्ह्याचा तपास स्थानिक गुन्हे शाखेकडे दिला होता. या पथकाला मिळालेल्या माहितीच्या आधारे फिर्यादीच्या बेड्यावर राहणारा अंकुश शिवा हटकर याने त्याचा साथीदार सुमित भीमराव हटकर याचे सोबत संगनमत करून उपरोक्त गुन्ह्यात १ लाख ९२ हजार ५०० रुपयांची रोख रक्कम चोरून नेली असल्याने दोन्ही आरोपींना ताब्यात घेऊन त्यांची कसून चौकशी केली. वेगवेगळी विचारपूस केली असता आरोपींनी प्रथम उडवाउडवीची उत्तरे दिली, नंतर पोलिसांनी खाक्या दाखवताच सदरचा गुन्हा संगनमताने केल्याची कबुली दिली.
आरोपीच्या ताब्यातून चोरीस गेलेली रक्कम १ लाख ९२ हजार ५०० रुपये रोख व चोरीसाठी वापरलेली १ लाख रुपये किमतीची दुचाकी, दोन मोबाईल असा एकूण ३ लाख १२ हजार ५०० रुपयांचा मुद्देमाल हस्तगत करण्यात आला. दोन्ही आरोपींना बेनोडा पोलिसांच्या ताब्यात देण्यात आले. सदर गुन्ह्याचा तपास अवघ्या १२ तासात करण्यात आला. या चोरट्यांकडून आणखी गुन्हे उघड होण्याची शक्यता पोलिसांनी वर्तविली आहे.