अमरावती : गत तीन वर्षांपासून प्रेमप्रकरण होते. युवतीने लग्नाची मागणी केली. मात्र, प्रियकराने लग्न करण्यास थेट नकार दिल्याने ३२ वर्षीय युवतीने गळफास घेऊन आत्महत्या केल्याची घटना भीमनगरात शनिवारी सकाळी ११.३० वाजताच्या सुमारास घडली. ती भीमनगरातील मैत्रिणीकडे भाड्याने राहत होती. तिच्या आत्महत्येस कारणीभूत ठरलेल्या प्रियकराविरुद्ध गाडगेनगर पोलिसांनी शनिवारी रात्री उशिरा गुन्हा नोंदवला. त्याला रविवारी न्यायालयासोर हजर केले असता, न्यायालयाने दोन दिवसांचा म्हणजे २९ मार्चपर्यंत पोलीस कोठडी सुनावली.
पवन मुकुंदराव खंडारे(२६, रा. राजमातानगर) असे आरोपीचे नाव आहे. याप्रकरणी युवतीच्या भावाने पोलिसांत तक्रार दिली आहे. पोलिसांना घटनास्थळी तिने प्रियकराला लिहिलेल्या प्रेम प्रकरणाच्या चिठ्ठ्या आढळून आल्यामुळेच तिने आत्महत्या का केली याचा उलगडा झाला. प्रेम प्रकरणादरम्यान तिचे लैंगिक शोषणही झाल्याचे प्राथमिक तपासात पुढे आले आहे. त्यामुळे गाडगेनगर पोलिसांनी आरोपीविरुद्ध भादंविचे कलम ३०६, ३७६ अन्वये गुन्हा नोंदविला. युवतीचा मृतदेह शवविच्छेदनासाठी इर्विन रुग्णालयातील शवागारात आणण्यात आला होता. पुढील तपास गाडगेनगरचे पोलीस निरीक्षक आसाराम चोरमले करीत आहेत.
कोट
भावाच्या तक्रारीवरून गुन्हा नोंदविला आहे. आरोपीला न्यायालयाने दोन दिवसांचा पीसीआर दिला आहे. पुढील तपास सुरू आहे.
आसाराम चोरमले, वरिष्ठ पोलीस निरीक्षक गाडगेनगर