अमरावती : फ्रेजरपुरा ठाण्यात कार्यरत पोलीस उपनिरीक्षक अनिल मुळे यांच्या आत्महत्या प्रकरणाची इत्थंभूत चौकशी करावी, अशी तक्रार वजा विनंती त्यांच्या कुटुंबीयांनी नांदगाव पेठ पोलिसांकडे केली होती. त्याअनुषंगाने चौकशीला वेेग देण्यात आला असून, आत्महत्या प्रकरणाचे सर्व कंगोरे तपासले जाणार आहेत. तसे आदेश चौकशी अधिकारी तथा सहायक पोलीस आयुक्त भारत गायकवाड यांना देण्यात आले आहेत.
१२ ऑगस्ट रोजी सायंकाळच्या सुमारास अनिल मुळे यांनी रहाटगाव मार्गावरील एका झाडाला गळफास घेऊन आत्महत्या केली. त्यानंतर त्यांच्या कुटुंबीयांच्यावतीने आत्महत्या प्रकरणाचा तपास करण्याचा तक्रार अर्ज आला. त्याअनुषंगाने त्या आकस्मिक मृत्यू प्रकरणाची चौकशी तातडीने एसीपी गायकवाड यांच्याकडे सोपविण्यात आली. चौकशीत जे-जे मुद्दे समोर येतील त्याची निष्पक्ष चौकशी केली जाणार असल्याचे पोलीस आयुक्त डॉ. आरती सिंह यांनी मंगळवारी सांगितले. मुळे यांचा मोबाईल सीडीआरदेखील तपासला जाणार आहे.