खरवाडीची पुनरावृत्ती टळली

चांदूरबाजार नजीकच्या खरवाडीत जनावरांची अवैध वाहतूक करणाऱ्या ट्रकने १२ वाहनांना धडक देत कारला चिरडल्याने तिघे ठार झाले होते.

मद्यधुंद ट्रक चालकाला अटक : बियाणी चौक ते विद्यापीठ रोडवरील घटना अमरावती : चांदूरबाजार नजीकच्या खरवाडीत जनावरांची अवैध वाहतूक करणाऱ्या ट्रकने १२ वाहनांना धडक देत कारला चिरडल्याने तिघे ठार झाले होते. या घटनेची पुनरावृत्ती मंगळवारी बियाणी चौक ते वेलकम पॉर्इंट मार्गावर घडणार होती. मात्र, वाहतूक पोलिसांच्या सतर्कतेने हा प्रकार टळला. या परिसरात एक भरधाव ट्रक दिसून येताच वाहतूक पोलिसांनी पाठलाग करून ट्रकला अडविल्याने मोठा अपघात टळला. ट्रकचालक बेजबाबदारपणे ट्रक पिटाळत होता. शहर पोलिसांनी जड वाहतुकीला प्रवेशबंदी केली आहे. तरीसुद्धा शहराच्या काही भागात जडवाहने प्रवेश करताना दिसून येतात. मंगळवारी विद्यापीठ ते बियाणी चौक मार्गावर स्टंट राईडिंग व एमव्ही अ‍ॅक्टची मोहीम राबविण्यात आली. सायंकाळी वाहतूक शाखेचे पोलीस निरीक्षक अजय मालविय यांच्या नेतृत्वात वाहतूक शाखेचे पोलीस उपनिरीक्षक बेले, पोलीस शिपाई सचिन श्रीवास, दिलीप रत्नपारखी, चालक अजय कवटकर वाहन तपासणी करीत होते. दरम्यान ट्रक क्रमांक एम.एच. एक्स. ३०७५ सुसाट वेगाने विद्यापीठाकडून बियाणी चौकाकडे जात होता. ही बाब लक्षात येताच मालवीयसह अन्य पोलिसांनी तत्काळ ट्रकला थांबविण्याचा प्रयत्न केला. मात्र, तो भरधाव ट्रक वेलकम पॉर्इंटच्या दिशेने निघून गेला. त्यामुळे पोलिसांनी जीपद्वारे ट्रकचा पाठलाग सुरू केला. अखेर वेलकम पॉर्इंटजवळ ट्रकला थांबविण्यात पोलिसांना यश मिळाले. चालकाने मद्यप्राशन केले होते. ट्रक चालकाने त्याचे नाव किसना रामराव तायडे सांगितले. गाडगेनगर पोलिसांनी आरोपीविरूद्ध भादंविच्या कलम २७९, १८४, १८५ मोटार वाहन कायद्यानुसार गुन्हा नोंदविला आहे. पुढील तपास एएसआय विजय गरूड करीत आहेत. (प्रतिनिधी) ध्वनीक्षेपकाद्वारे नागरिकांना दिल्या सूचना भरधाव ट्रक बियाणी चौकातून वेलकम पॉर्इंटच्या दिशेने जात असताना पोलीस ट्रकचा पाठलाग करीत होते. या मार्गावर वर्दळ सुरु असल्यामुळे पोलिसांनी ध्वनीक्षेपकाद्वारे वाहनाधारकांना सूचना देणे सुरु ठेवले होते. त्यामुळे वाहनधारक सुरक्षित अंतरावरून वाहने चालवित होते. भरधाव ट्रक बियाणी चौकातून वेलकम पॉर्इंटकडे धोकादायक स्थितीत जात होता. त्याचा पाठलाग करताना मार्गावरील वाहनधारकांना लाऊडस्पिकर्सद्वारे बाजूला सरकण्यास सांगण्यात आले. त्या ट्रकला अखेर वेलकम पॉर्इंटजवळ अडविले. - अजय मालविय, पोलीस निरीक्षक, वाहतूक शाखा.