अमरावती : वाहतूक पोलिसाशी वाद घालत एका शिवसेना पदाधिकाऱ्याने चालान मशीन हिसकल्याची घटना स्थानिक पंचवटी चौकात ९ ऑगस्ट रोजी घडली, याप्रकरणी नंदू त्र्यंबकराव काळे (४०, रा. लक्ष्मीनगर, अमरावती) याच्याविरुद्ध शासकीय कामकाजात अडथळा, शिवीगाळ व धमकी दिल्याचा गुन्हा दाखल केला.
वाहतूक शाखेतील कर्मचारी शिवनाथ कातकडे हे ९ ऑगस्ट रोजी दुपारी पंचवटी चौकात कर्तव्यावर असताना एमएच २७ बीएक्स २६२६ क्रमांकाची कार सार्वजनिक रस्तावर पार्क केलेली आढळली. ती तेथून काढून घेण्याची सुचना कातकडे यांनी चालकाला केली. त्यावर तू मला ओळखत नाही का? असे बजावत त्या वाहनचालकाने स्वत:ची ओळख शिवसेना उपप्रमुख नंदू काळे अशी करून दिली. त्याने अश्लील शिवीगाळ देखील केली. कातकडे हे वाहनाला चालान करण्यास गेले असता, आरोपीने त्यांच्या हातातील चालान मशिन हिसकावून घेतली. चालान देण्यास रोखून शासकीय कामात अडथळा निर्माण केला. आरोपीने आपल्याला आज ना उद्या पाहून घेण्याची धमकी देखील दिल्याचे कातकडेे यांनी गाडगेनगर पोलिसांत नोंदविलेल्या तक्रारीत म्हटले आहे. घटनेची माहिती मिळताच पोलीस उपनिरिक्षक सामटकर यांनी घटनास्थळी भेट दिली. आरोपीला अटक करण्यात आली नाही.