अमरावती : एका महाविद्यालयीन विद्यार्थिनीने अंबा एक्सप्रेस रेल्वेगाडीसमोर झोकून देत आत्महत्या केली. ही धक्कादायक घटना ९ सप्टेंबर रोजी सकाळी नवाथे चौक स्थित एका हॉटेलमागील रेल्वे रुळावर घडली. इशा (१८, महाजनपुरा, खोलापुरी गेट) असे मृत विद्यार्थिनीचे नाव आहे. तिच्या आत्महत्येचे कारण स्पष्ट होऊ शकले नाही. दरम्यान राजापेठ पोलिसांनी आकस्मिक मृत्यूची नोंद केली.
इशा ही स्थानिक महाविद्यालयात शिक्षण घेत होती. शनिवारी सकाळी तिने रंगोली पर्ल हॉटेलमागील रेल्वे रुळावर रेल्वेसमोर उडी घेऊन आत्महत्या केली. या घटनेच्या माहितीवरून राजापेठच्या ठाणेदार सिमा दाताळकर यांनी पथकासह घटनास्थळी धाव घेतली. पंचनामा करून मृतदेह जिल्हा सामान्य रुग्णालयात पाठविण्यात आला.
या घटनेच्या अनुषंगाने शनिवारी सायंकाळपर्यंत मृताच्या कुटुंबीयांनी तक्रार केली नव्हती. त्यामुळे पोलिसांनी या घटनेच्या अनुषंगाने आकस्मिक मृत्यूची नोंद केली आहे.