अमरावती : विकास शुल्काअभावी विविध लेआऊटमधील महापालिकेला हस्तांतरीत करण्यात आलेल्या ९७० भूखंडाची विक्री आतापर्यंत प्रशासनाद्वारा करण्यात आलेली आहे. याद्वारे प्राप्त रक्कम त्याच भागाच्या विकासासाठी करण्यात आल्याचे प्रशासनाद्वारा सांगण्यात आले.
प्रशासनाकडे आकोली १३६, पेठ अमरावती ७९, वडाळी १९, निंभोरा २२, जेवड ६२, वरुडा ३३, गंभीरपुरा १२, महाजनपुरा २३, वडद ०६, बडनेरा १८८, नवसारी २०४, शेगाव १०५, रहाटगाव १८५, म्हसला १४०, तारखेडा १७, बेनोेडा ८९ याशिवाय आयडीएसएमटीत २२४ भूखंड महापालिकेला विकास शुल्कासाठी हस्तांतरित करण्यात आले आहेत. यापैकी ९७० भूखंडाची विक्री करण्यात आलेली आहे. याशिवाय प्रधानमंत्री आवास योजनेकरिता २३० भूखंडाचा वापर करण्यात आलेला आहे. अजूनही ३०४ भूखंड महापालिकेजवळ आहेत. यामध्ये अनेक भूखंडाच्या किमती वाढल्याने त्याचा अधिक मोबदला मिळाल्यास त्या ले-आऊटचा अधिक विकास करणे शक्य होणार आहे.