अमरावती : बहुप्रतीक्षित राजापेठच्या रेल्वे अंडरपासचे वृद्ध आणि शाळकरी विद्यार्थ्यांच्या हस्ते शनिवारी लोकार्पण करण्यात आले. आमदार रवि राणा यांनी या राजकीय खेळीने भाजपला शह दिला तसेच पुन्हा एकदा नागरिकांचे लक्ष आपल्याकडे वळविले. महापौर चेतन गावंडे यांनी या अंडरपासचे लोकार्पण लवकरच माजी मुख्यमंत्री देवेंद्र फडणवीस यांच्या हस्ते होणार असल्याचे शुक्रवारीच जाहीर केले होते, हे विशेष.
बडनेरा विधानसभा मतदारसंघात विकासकामांच्या आड कुणी येत असेल, तर त्याला आडवे करू, अशी जाहीर तंबी देणारे आमदार रवि राणा यांनी शनिवारी अंडरपासच्या लोकार्पण सोहळ्याप्रसंगी ‘हम है राणाजी’ हे दाखवून दिले. तत्पूर्वी, शुक्रवारी आ. राणांनी महापालिका अधिकाऱ्यांसमवेत अंडरपासची पाहणी केली. या कामात काही उणिवा असतील तर त्या रात्रीतून पूर्ण करा, असे निर्देशही त्यांनी दिले होते. शनिवारी हा अंडरपास हार-फुलांनी सजविण्यात आला होता. आ. रवि राणा गळ्यात केशरी दुपट्टा परिधान शेकडो कार्यकर्त्यांसह लोकार्पणासाठी जात असताना राजापेठ परिसरातील नागरिकांनी त्यांच्यावर फुलांची उधळण करून आनंदोत्सव साजरा केला. पाच वर्षांपासून या मार्गाच्या बांधकामावर चौकीदारी करणारे ७७ वर्षीय भाऊराव डोंगरे आणि एका शाळकरी विद्यार्थ्याच्या हस्ते लोकार्पण करण्यात आले. यावेळी ढोल-ताशांच्या गजर, फटाक्यांची आतषबाजी करण्यात आली. आ. राणा यांनी रेल्वे अंडरपास शनिवारी जनतेसाठी सुरू करू, हा दिलेला शब्द पाळल्याची चर्चा राजापेठ परिसरात होती.
बल्लू जव्हेरी, सुनील राणा, जयंतराव वानखडे, युवा स्वाभिमानचे जिल्हाध्यक्ष जितू दुधाने, शहर अध्यक्ष संजय हिंगासपुरे, शैलेंद्र कस्तुरे, शिक्षण सभापती आशिष गावंडे, नगरसेविका सुमती ढोके, महिला जिल्हाध्यक्ष ज्योती सैरिसे, नितीन बोरेकर, अजय मोरय्या, अजय गाडे, संजय मुणोत, संदीप गुल्हाने, प्रवीण सावळे, अनूप अग्रवाल, अभिजित देशमुख, अविनाश तापडिया, पंकज बोबडे, सचिन भेंडे, विनोद गुहे, पराग चिमोटे, बाळू इंगोले, विलास सोनकुसरे, अनिल मिश्रा, सूरज मिश्रा, संतोष कोलटेके, गणेशदास गायकवाड, महेश मूलचंदानी, किशोर पिवाल, सुरेश खत्री, नाना सावरकर, राहुल बजाज, विकी ढेगेकर, विजू टवलारे, नितीन अनासाने, जयप्रकाश लद्धा, अयूब खान, शहजाद खान, अर्चना तालन, मीरा कोलटेके, शालिनी देवरे, अलका इंगोले, शोभा किटके, चंदा लांडे आदी उपस्थित होते.
---------------
मी जनतेचा आमदार आहे. जनहितासाठी सदैव लढणार आहे. हा मार्ग राजकीय-प्रशासकीय अडथळ्यांमुळे रखडला होता. आज नागरिकांच्या सेवेत मार्ग खुला करताना अत्यानंद होत आहे. हा अविस्मरणीय सुवर्णक्षण आहे.
- रवि राणा, आमदार