अमरावती : राणा लँडमार्क फसवणूकप्रकरणी आर्थिक गुन्हे शाखेने ७२२० पानांचे आरोपपत्र तयार केले असून शनिवारी आरोपत्र पोलिसांतर्फे न्यायालयात दाखल करण्यात येणार आहे.आर्थिक गुन्हे शाखेचे निरीक्षक गणेश अणे यांनी सांगितले की, २५ सप्टेंबर २०१४ रोजी कोतवाली ठाण्यात शिरजगाव येथील शरद कुकडे यांच्या तक्रारीवरुन राणा लँडमार्कचे संचालक योगेश राणा आणि त्याचे भाऊ चंद्रशेखर राणा व व्यवस्थापक अभिजित लोखंडे यांच्या विरोधात फसवणूकीचा गुन्हा दाखल केला आहे. घटनेच्या दुसऱ्या दिवशी योगेश राणा यांना अटक करण्यात आली होती. त्यांना १५ दिवस पोलीस कोठडीत ठेवण्यात आल्यानंतर त्यांची रवानगी तुरुंगात करण्यात आली. चंद्रशेखर राणा आताही फरार आहे. तर लोखंडे यांची जामिनावर सुटका करण्यात आली. कमी पैशात फ्लॅट देण्याचे आमीष देऊन शेकडो नागरिकांची फसवणूक करण्यात आली होती. एकूण ४१९ नागरिकांच्या तक्रारी प्राप्त झाल्या होत्या. राणा लँड मार्कने एकूण ८ कोटी ८१ लाख ९६ हजार २९५ रुपयांनी फसवणूक केली आहे. पोलीसांनी तपास करतांना योगेश आणि चंद्रशेखर राणा यांचे ७ बँक खाते गोठविले आहे. त्यात ५२ हजार ८६६ रुपये जमा आहे. याव्यतिरिक्त घरची झडती घेतली असता ६३ हजार २०० रुपयांचा माल जप्त करण्यात आला आहे. पोलीसांनी ९० दिवसाच्या आत या प्रकरणाची तपासणी करुन एकूण ७२२० पानांचे आरोपपत्र तयार केले आहे. हे आरोपपत्र शनिवारी न्यायालयात दाखल करण्यात येणार आहे. (प्रतिनिधी)
राणा लॅन्ड मार्क प्रकरण, आरोपपत्र दाखल होणार
By admin | Updated: December 20, 2014 00:11 IST