अमरावती : वाहन परवाना बनविण्यासाठी बनावट फिटनेस सर्टीफिकेटचा वापर करणाऱ्या ज्ञानेश्वर ड्राईव्हिंग स्कूलमध्ये गाडगेनगर पोलिसांनी गुरुवारी दुपारी धाड टाकली. मालकासह एका कॅम्प्युट ऑपरेटरला ताब्यात घेतले. कार्यालयातील संगणकासह एक हजारावर बनावट दस्तावेज पोलिसांनी जप्त केले. या कारवाईमुळे प्रादेशिक परिवहन कार्यालय परिसरासह अन्य ड्राईव्हींग स्कूलचालकांमध्ये खळबळ उडाली. पाच महिन्यांपासून आरटीओ कार्यालय परिसरात हा गोरखधंदा सुरू होता.
प्रादेशिक परिवहन कार्यालयाजवळील आवारात रोशन मातकर यांच्या मालकीची इमारत असून, ज्ञानेश्वर ड्राईव्हिंग स्कूलचे संचालक योगेश प्रभुराव घुगे (रा. कॅम्प, सुंदरलाल चौक) यांनी ती इमारत भाडे तत्त्वावर घेतली आहे. घुगे यांनी सप्टेंबर २०२० पासून तेथे ज्ञानेश्वर ड्राईव्हिंग स्कूल सुरू केली. या ड्राईव्हिंग स्कुलच्या कार्यालयामार्फत वाहनधारकांना आरटीओ कार्यालयातून परवाना काढून देण्याचे काम केले जात होते. परंतु परवान्यासाठी वाहनचालकांना लागणारे फिटनेस सर्टिफिकेट ज्ञानेश्वर ड्राईव्हिंग स्कूलमध्ये तयार केले जात होते. या गोरखधंद्याचा गाडगेनगर पोलिसांनी गुरुवारी भंडाफोड केला. आरोपीविरुद्ध भादंविचे कलम ४२०, ४१९, ४१७, ४६७, ४६८, ४७१, ४७२, ४७३ अन्वये गुन्हा नोंदविला. यासदर्भात आरटीओच्या अधिकाऱ्यांशी संपर्क साधण्याचा प्रयत्न केला असता, होऊ शकला नाही.
बॉक्स
तक्रारीनंतर पोलिसांचा छापा
यशोदानगरातील रहिवासी नितीन भगवंत गाडे यांनी ज्ञानेश्वर ड्राईव्हिंग स्कूलमध्ये वाहन परवान्यासंबंधाने गेले होते. त्यावेळी त्यांनी वाहन परवान्याचे काम करून देण्यासाठी गाडेकडून तीन हजार रुपये घेतले. ज्ञानेश्वर ड्राईव्हिंग स्कूलमार्फत गाडे यांचे दस्तावेज तयार करून ते आरटीओकडे पाठविले. परंतु त्यातील फिटनेस सर्टिफिकेट बनावट असल्याचा संशय गाडे यांना आल्यामुळे त्यांनी गाडगेनगर पोलिसांत तक्रार नोंदविली. त्यानुसार २७ जानेवारी रोजी गाडगेनगरचे ठाणेदार आसाराम चोरमले, पोलीस उपनिरीक्षक राजेंद्र लेवटकर, पोलीस हवालदार आस्तिक देशमुख यांच्या पथकाने ज्ञानेश्वर ड्राईव्हिंग स्कूलवर छापा मारला. त्यावेळी बनावट फिटनेस सर्टिफिकेटचा पर्दाफाश झाला.
बॉक्स
बनावट शिक्के, संगणकासह दस्तावेज जप्त
वाहन परवान्यासाठी अधिकृत वैद्यकीय अधिकाऱ्यामार्फत फिटनेस सर्टिफिकेट बनविणे आवश्यक असते. परंतु, या कार्यालयातच फिटनेस सर्टिफिकेट तयार करून ते वाहन परवान्याच्या दस्तावेजात जोडले जात होते. या सर्टिफिकेटवर डॉ. वैभव गरकळ (एमबीबीएस) यांच्या नावाच्या शिक्काचा वापरण्यात आला होता. त्यामुळे हा प्रकार फसवणुकीचा असल्याचे पोलिसांच्या निदर्शनास आले. पोलिसांनी ज्ञानेश्वर ड्राईव्हिंग स्कुलच्या कार्यालयातून चार शिक्के, एक संगणक व बनावट फिटनेस सर्टिफिकेटचे दस्तावेज जप्त केले.
कोट
एका इसमाच्या तक्रारीवरून सदर ड्रायव्हिंग स्कूलवर धाड टाकण्यात आली. बनावट दस्तावेज जप्त केले. याप्रकरणी दोघांना अटक केली असून, शुक्रवारी न्यायालयासमोर हजर केले जाईल.
- आसाराम चोरमले, वरिष्ठ पोलीस निरीक्षक, गाडगेनगर ठाणे