चार रुग्णांचे वाचविले प्राण, तासाभराच्या प्रयत्नानंतर परिस्थिती नियंत्रणात
अमरावती : येथील डॉ. पंजाबराव देशमुख स्मृती वैद्यकीय महाविद्यालयात बुधवारी सायंकाळी ७ वाजताच्या सुमारास प्राणवायूचा तुटवडा झाल्याने तारांबळ उडाली. अतिदक्षता विभागात उपचार घेणारे कोविड, नॉन कोविड रुग्णांच्या सेवेसाठी धावपळ झाली. अखेर तासाभरांच्या प्रयत्नानंतर डॉक्टरांच्या चमुने परिस्थिती नियंत्रणात आणली, हे विशेष.
पीडीएमसीत बुधवारी सायंकाळी ७ वाजता प्राणवायूचा तुटवडा झाल्यामुळे तारांबळ उडाली होती. मात्र, यात कोणतीही अप्रिय घटना घडली नाही, असे रुग्णालयाने गुरुवारी स्पष्ट केले. अतिदक्षता विभागात कोविड, नॉन कोविड रुग्ण उपचार घेत असताना सायंकाळी ७ वाजताच्या सुमारास प्राणवायूचा तुटवडा डॉक्टर व त्यांच्या चमूला जाणवला. रुग्णसेवेसाठी नातेवाईकांनी डॉक्टरांची भेट घेतली. त्यानंतर पीडीएमसीची वैद्यकीय चमू, कर्मचारी, सुरक्षा रक्षकांनी दक्षता घेत गर्दी होऊ नये, यासाठी पीडीएमसीचे मु्ख्य प्रवेशद्धार काही वेळेसाठी बंद केले. दरम्यान पीडीएमसीतील अतिदक्षता विभागातील चार रुग्णांना जिल्हा सामान्य रुग्णालयात हलविण्यात आले. काही वेळेतच इर्विनमध्ये या चारही रुग्णांना प्राणवायू उपलब्ध करून दिला आणि या रुग्णांचे जीव वाचविण्यासाठी शर्तीचे प्रयत्न करण्यात आले. पीडीएमसीच्या चमुंनी रुग्णांना पुन्हा प्राणवायू उपलब्ध करून देण्यासाठी केलेली धावपळ खरेच रूग्णसेवेचे प्रतीक ठरले.
-------------
कोट
रुग्णालयांत प्राणवायूचा तुटवडा आहे. यातून मार्ग काढला जात असून, प्राणवायू मुबलक प्रमाणात लवकरच उपलब्ध होईल. रुग्णसेवा आणि लोकांच्या जीवाची काळजी घेतली जात आहे. नागरिकांनी कोरोना नियमांचे पालन करुन आरोग्य यंत्रणेला सहकार्य करावे.
- यशोमती ठाकूर, पालकमंत्री.
कोट
रुग्णालयात केवळ प्राणवायूचा तुटवडा झाला होता. मात्र, रुग्णालयातील चमूने ही परिस्थिती व्यवस्थितपणे हाताळली. तासाभरातच कोविड, नॉन कोविड रुग्णांना प्राणवायू उपलब्ध करून देण्यात आला.
- अनिल देशमुख, अधिष्ठाता, डॉ. पंजाबराव देशमुख स्मृती वैद्यकीय महाविद्यालय