बिझीलॅन्डजवळील घटना : कठोरा गांधी गावात शोककळाअमरावती : अज्ञात ट्रकच्या धडकेत एक जण जागीच ठार झाला तर दोन जण जखमी झाले. ही घटना शनिवारी सकाळी ११.१५ वाजताच्या सुमारास नांदगाव पेठ पोलीस ठाण्याच्या हद्दीतील बिझिलॅण्डजवळील मार्गावर घडली. सचिन मधुकर जवंजाळ (२९,रा. कठोरा गांधी) असे मृताचे नाव आहे. इर्विनच्या नेत्र विभागातर्फे मृताच्या नातेवाईकांना समुपदेशन करण्यात आल्यानंतर मृताचे नेत्रदान करण्यात आले. पोलीस सूत्रानुसार, मृत सचिन जवंजाळ, प्रतीक समाधान वानखडे (२७) व समाधान वानखडे (४०) हे तिघेही शनिवारी कठोरा गांधीहून दुचाकीने अमरावतीमधील विलास नगरात येत होते. दरम्यान बिझीलॅन्डजवळील मार्गावर त्यांच्या दुचाकीला अज्ञात ट्रकने धडक दिली. यामध्ये सचीनचा घटनास्थळीच मृत्यू झाला, तर समाधान वानखडे गंभीर जखमी झाले असून प्रतीक वानखडे किरकोळ जखमी झाले. काही नागरिकांच्या मदतीने मृत सचीन व जखमींना तत्काळ इर्विनमध्ये दाखल करण्यात आले. मात्र, डॉक्टरांनी सचिन जवंजाळला मृत घोषित केले तर जखमीचा उपचार सरू केला. गंभीर जखमी समाधान वानखडे यांना खासगी रुग्णालयात हटविण्यात आले आहे. या घटनेची माहिती मिळताच नांदगाव पेठ पोलिसांनी घटनास्थळी जावून पंचनामा केला. पोलिसांनी ट्रक चालकाला ताब्यात घेतले असून ट्रक जप्त करण्यात आला आहे. त्यानंतर जखमींचे बयाण नोंदविले. मृतक सचीन हा काही दिवसांपूर्वी स्थानिक वृत्तपत्रात पत्रकार म्हणून कार्यरत होता. मात्र, त्यानंतर त्याने शेतीकडे लक्ष देणे सुरू केले होते. त्यांच्या अपघाती निधनामुळे परिसरात शोककळा पसरली आहे. (प्रतिनिधी)
ट्रकच्या धडकेत एक ठार, दोन जखमी
By admin | Updated: June 12, 2016 00:03 IST