बडनेरा : शासन, प्रशासनाने कोरोना संसर्ग नियंत्रणात आणण्यासाठी संचारबंदी लागू केली आहे. बडनेरा शहरात विनामास्क फिरणाऱ्यांची संख्या वाढत आहे. त्यामुळे कोरोनाचा धोका वाढत असल्याने नियम तोडणाऱ्यांविरुद्ध प्रशासनाने कडक कारवाई करणे गरजेचे आहे.
कोरोना संसर्गाने सर्वत्र धुमाकूळ घातला आहे. त्यावर नियंत्रण मिळविण्यासाठी शासनाने संचारबंदी लागू केली आहे. बडनेरा शहरात बहुतांश हातगाडीवाले मास्क लावत नाही. त्याचप्रमाणे रस्त्यांवरून फिरणारे बरेच लोक मास्कविनाच भटकंती करीत असल्याचे दिसून पडते आहे. पोलीस निरीक्षक पंजाब बंजारी यांनी शहरात पेट्रोलिंग दरम्यान दुकानदार तसेच रस्त्यावरून फिरणाऱ्यांना कडक कारवाई करू, अशी तंबी दिली आहे. ठरवून दिलेल्या नियमानुसार शहरातील दुकाने बंद आहेत. मात्र रस्त्यावरची गर्दी काही कमी होत नसल्याचे चित्र आहे. प्रशासनाला अशा विनाकारण फिरणाऱ्यांवर कारवाईचा बडगा उगारणे आवश्यक आहे. गतवर्षी बडनेरा शहर कोरोनाचा हॉटस्पॉट बनला होता. यंदा नियंत्रणात असला तरी मात्र नियम न पाळल्यास कोरोना रुग्णांच्या संख्येत वाढ होण्याची शक्यता नाकारता येणार नाही, असे जाणकारांमधून बोलले जात आहे.