अमरावती : स्थानिक जुन्या बायपासवर रस्ते निर्मितीची कामे वेगाने सुरू आहेत. काही ठिकाणी पुलाची निर्मिती होत असल्याने वाहनचालकांना वळण घेऊन जावे लागत आहे. अमरावती-बडनेरा दरम्यान जुन्या बायपासवर रस्ते निर्मितीला वेग आला आहे.
--------------
राजापेठ येथे भुयारी कामे संथगतीने
अमरावती : येथील राजापेठ भागात भुयारी कामे संथगतीने सुरू आहे. त्यामुळे उड्डाणपुलावरून वाहतूक सुरू आहे. हा पूल अरुंद असल्यामुळे वाहतूक विस्कळीत होत असल्याचे चित्र आहे. राजापेठ उड्डाणपुलाखालील कामे वेगाने करावी, अशी मागणी वाहनचालक, व्यापाऱ्यांची आहे.
-------------------
बडनेरा मार्गावर डांबरीकरण पूर्णत्वास
अमरावती : बडनेरा मार्गावर सातुर्णा, गोपालनगर भागात डांबरीकरणाचे कामे वेगाने पूर्णत्वास आली आहेत. या मार्गावर रस्त्यावर जागोजागी खड्डे पडले होते. हे खड्डे अपघातास कारणीभूत ठरणारे असताना, आता डांबरीकरण झाल्यामुळे वाहनचालकांना मोठा दिलासा मानला जात आहे.
-----------------------
माता खिडकी ते भातकुली मार्ग उखडला
अमरावती : स्थानिक माता खिडकी ते भातकुली मार्गावर खड्डे पडल्याने रस्त्यात खड्डा की खड्ड्यात रस्ता असे विदारक चित्र निर्माण झाले आहे. बांधकाम विभागाने या मार्गावरील खड्डे दुरुस्तीसाठी पुढाकार घ्यावा, अशी मागणी होत आहे. या मार्गावरून ग्रामीण भागात वाहतूक मोठ्या प्रमाणात होते. मात्र, खड्ड्यांमुळे ग्रामस्थ हैराण झाले आहे.
-----------------------
वडाळीत वनजमिनीवर वीटभट्ट्या
अमरावती : स्थानिक आशियाना क्लब ते वडाळी या मार्गावर वनजमिनीवर वीटभट्ट्यांचे अतिक्रमण वाढले आहे. महसूल विभागाच्या आशीर्वादाने हा सर्व प्रकार सुरू आहे. काही प्रकरणे न्यायप्रविष्ट असल्याने वनविभाग हतबल झाला आहे. बिच्छुटेकडी भागात वीटभट्ट्यांचे अतिक्रमण वाढीस लागले आहे.