वरूड :- शेंदूरजनाघाट ते पुसला रस्त्यावर तिजारे तलावात तीन दिवसांपूर्वी अमरानती येथील २१ वर्षीय युवकाचा मृतदेह आढळून आला होता. जादूटोण्यातून या युवकाची गळा आवळून हत्या करण्यात आल्याचे आता स्पष्ट झाले आहे. पोलिसांनी एका आरोपीला अटक केली असून, उत्तर प्रदेशचा सद्दाम नामक आरोपी पसार झाला आहे. या प्रकरणात खुनाचा गुन्हा दाखल करण्यात आला आहे.
पोलीस सूत्रांनुसार, मृतकाचे नाव फईमोद्दीन नसरुद्दीन काझी (२१, रा. वीटभट्टी, नागपुरी गेट, अमरावती) असे आहे. त्याचा मृतदेह २ सप्टेंबरला पुसलालगत तिजारे तलावात आढळून आला. शवविच्छेदनानंतर गळा आवळल्याची माहिती पुढे आली. तो बुधवारच्या सकाळी १० वाजता एका मित्रांसोबत परतवाडा येथे वाहन पाहण्याकरिता गेला होता. तेथून तो परतला नव्हता. पोलिसांनी या माहितीवरून त्याचा मित्र नवाज खान नूर खान (३२, रा. अमरावती) याला ताब्यात घेतले. उत्तर प्रदेशातील सद्दाम नामक व्यक्तीला त्याने जादूटोणा केल्याचा संशय होता. यामुळे त्याच्या सांगण्यावरून फईमोद्दीनला नवसारी येथून ताब्यात दिल्याची कबुली नवाजने दिली. त्याला न्यायालयात हजर करण्यात आले असता न्यायालयाने ...... दिवसांची पोलीस कोठडी सुनावली.
शेंदूरजनाघाट पोलिसांनी भादंविचे कलम ३०२, २०१ अन्वये गुन्हा दाखल केला. पुढील तपास उपविभागीय अधिकारी कविता फडतरे यांच्या मार्गदर्शनाखाली ठाणेदार देवेंद्र ठाकूर, सहायक पोलीस निरीक्षक शुभांगी थोरात, जमादार लक्ष्मण साने, संजय उदापुरे, रत्नदीप वानखडे, नरेश घुगे, हरीश सायनेरे आदी करीत आहेत. या प्रकरणात आणखी काही मासे अडकतील, अशी शक्यता व्यक्त होत आहे.