अमरावती : खून, बलात्कार, घरफोड्या, चोऱ्या तसेच खुनाचा प्रयत्न अशा घटनांनी २०२० हे सरते वर्ष गाजले. गत ११ महिन्यांत शहरात खुनाच्या २२ घटना घडल्या, तर खुनाच्या प्रयत्नाच्या ६५ घटना पुढे आल्या आहेत. महिलांवरील लैगिंक अत्याचाराच्या ६९ घटना घडल्याची माहिती पोलिसांनी दिली.
दोन अल्पवयीन मुलांनी एका युवकाला चाकूने भोसकल्याची घटना ताजी आहे. दोन आठवड्यांपूर्वी एका डॉक्टरने महिलेवर कारमध्ये अत्याचार केल्याची घटना उघडकीस आली होती. यंदा दरोड्याची एक घटना घडली, तर जबरी चोरीच्या ६५ घटना पुढे आल्या. घरफोडीच्या घटनांत वाढ होऊन यंदा २०४, चोरी ७६६, मोटर वाहन चोरी ३०१, गैरकायद्याची मंडळी जमवून गुन्हा ६८, विश्वासघात १३, फसवणूक १२८, पळवून नेणे ७६, दुखापत ६२३, शासकीय कर्मचाऱ्यांवर हल्ला २३, विनयभंग २६८, मोटार वाहन अपघातात मृत्यू ६९, गंभीर व किरकोळ अपघात १७७ तसेच पती व सारसरच्या मंडळीकडून महिलांचा छळ (४९८ अ) संबंधी ६९ घटना घडल्या आहेत.
बॉक्स:
दीड महिन्याचा चिमुकला विहिरीत आढळला
एकनाथपुरम् परिसरातील न्यू प्रभात कॉलनीतील पोलीस पित्याच्या घरी माहेरी आलेल्या एका महिलेच्या दीड महिन्याच्या बाळाचे अपहरण व दुसऱ्या दिवशी घराच्या परिसरात असलेल्या विहिरीत आढळलेला त्याचा मृतदेह या प्रकरणात मातेला राजापेठ पोलिसांनी अटक केली. हे प्रकरण शहरात सर्वाधिक चर्चेत राहिले. आईला अटक झाली तरी तिने पोलिसांना खुनाची कबुली दिलेली नाही. त्यामुळे बाळाचा खून कुणी व का केला, याचे गूढ अद्यापही कायम आहे.
बॉक्स:
डॉक्टरने केला बलात्कार
फॅमिली डॉक्टरनेच उपचाराकरिता येणाऱ्या महिलेला एसआरपीएफ क्वार्टरनजीक कारने नेऊन गुंगीचे औषध देऊन अत्याचार केला. त्यानंतर डॉक्टरला फ्रेजरपुरा पोलिसांनी अटक केली. हे प्रकरण सर्वाधिक चर्चेत आले. याच ठाण्याच्या हद्दीत एका महिलेवर भानखेडा मार्गावरील शेतात तिघांनी सामूहिक अत्याचार केल्याचे प्रकरण दोन महिन्यांपूर्वी घडले होते.
बॉक्स:
बत्त्याने ठेचून भावाची हत्या
बत्त्याने ठेचून बहिणीने धाकट्या १० वर्षीय भावाची हत्या केल्याची घटना खोलापुरीगेट ठाण्याच्या हद्दीत चार महिन्यांपूर्वी घडली होती. याप्रकरणी पोलिसांनी बहिणीला अटक केली. ताई, तू घरून निघून जाऊ नको, असे भावाने म्हणताच तिचा राग अनावर झाला. त्यानंतर तिने हा गुन्हा केल्याचे पोलिसांच्या तपासात निष्पन्न झाले होते.
बॉक्स
सुवर्णकारांच्या घरी जबरी चोरी
राजापेठ ठाण्याच्या हद्दीत माधवनगरातील सुर्वणकाराच्या घरी पती-पत्नीवर चाकूने हल्ला चढवून लाखो रुपयांचे सोन्या- चांदीचे दागिने सिने स्टाईल चोरून नेल्याची घटना दीड महिन्यांपूर्वी घडली. या घटनेचा सुगावा जरी पोलिसांना लागला असला तरी मुख्य आरोपीपर्यंत अद्याप राजापेठ पोलीस पोहोचली नाहीत.
१ जानेवारी ते ३० नोव्हेंबर ११ महिन्यांतील गुन्हे
२०१९ चे गुन्हे २०२० चे गुन्हे
खून २५ २२
खुनाचा प्रयत्न ५८ ६५
बलात्कार ७६ ६९
दरोडा ५ १
जबरी चोरी ५८ ६५
घरफोडी १५९ २०४
चोरी ७९६ ७६६
विनयभंग २७३ २६८