जिल्हाधिका-यांकडून विभागीय सेवा संदर्भ रुग्णालयात व्यवस्थेची पाहणी
अमरावती : कोरोनाग्रस्तांच्या उपचारांना गती मिळावी व गृह विलगीकरणातील रुग्णांबाबतच्या प्रक्रियेत सुसूत्रता असावी, यासाठी सुपर स्पेशालिटी रुग्णालयात स्वतंत्र ओपीडी सुरू करण्यात आली आहे. वाढत्या संसर्गाच्या पार्श्वभूमीवर जिल्हाधिकारी शैलेश नवाल यांनी शनिवारी विभागीय संदर्भ रुग्णालयतील ही ओपीडी व वलगाव येथे विलगीकरण केंद्रातील सुविधांची पाहणी केली. जिल्हा शल्यचिकित्सक श्यामसुंदर निकम, रुग्णालयाचे निवासी वैद्यकीय अधिकारी रवि भूषण, स्टाफ नर्स वर्षा पागोटे आदी यावेळी उपस्थित होते.
लक्षणे नसलेल्या बाधित रुग्णांना गृह विलगीकरणाची परवानगी दिली जाते. मात्र, विलगीकरणाच्या काळात त्यांनी घराबाहेर पडून इतरांच्या संपर्कात येऊ नये, यासाठी त्यांच्याकडून बंधपत्र लिहून घेतले जात आहे. ही कार्यवाही अचूकपणे करावी. ओपीडीसाठी स्वतंत्र रस्ता व दिशानिर्देश करणारे फलक लावावे. रुग्णालयाजवळ गर्दी टाळण्यासाठी आवश्यक तिथे बॅरिकेड लावावे, असे निर्देश जिल्हाधिका-यांनी दिले.
जोखमीच्या रुग्णांना सुपर स्पेशालिटीत उपचार दिले जातात. त्यात अलीकडे व्हेंटिलेटरची गरज असलेले रुग्णही वाढत आहेत. त्यामुळे त्यानुसार वेळीच व्यवस्था ठेवावी आदी निर्देश जिल्हाधिका-यांनी दिले.
बॉक्स
स्वतंत्र ई-ऑटोरिक्षाच्या व्यवस्थेचे निर्देश
सध्या विभागीय संदर्भ रुग्णालयात ३५० खाटांची व्यवस्था आहे. ऑक्सिजन व व्हेंटिलेटरची पुरेशी व्यवस्था आहे. अनेकदा एक्स-रे आदींची गरज भासते. या दृष्टीने वाहतुकीची सोय म्हणून स्वतंत्र इलेक्ट्रिक ऑटोरिक्षाची व्यवस्था करावी. बहुतेक खाटांना ऑक्सिजनची सुविधा आहे. तरीही एकदा संपूर्ण तपासणी करून घेण्याचे निर्देश जिल्हाधिका०नी दिले.
---------------