पान ३ साठी
अमरावती : रेमडेसिविर व इतर शेड्यूल्ड ड्रग्जच्या वापराबाबत रुग्णालयांनीही त्यांच्या स्तरावर संनियंत्रण केले पाहिजे तसेच त्याच्या वापराबाबत संपूर्ण अभिलेख अद्ययावत ठेवावा, असे स्पष्ट निर्देश जिल्हाधिकारी शैलेश नवाल यांनी शनिवारी येथे दिले.
जिल्हा प्रशासन व अमरावती महापालिकेमार्फत कोरोना उपचार प्रोटोकॉल व म्युकरमायकोसिस आजारासंबंधी डॉक्टरांची कार्यशाळा बचत भवनात झाली. त्यावेळी ते बोलत होते. महापालिका आयुक्त प्रशांत रोडे, जिल्हा शल्यचिकित्सक डॉ. श्यामसुंदर निकम यांच्यासह अनेक मान्यवर डॉक्टर यावेळी उपस्थित होते. नवाल म्हणाले की, रेमडेसिविर व इतर शेड्यूल्ड ड्रग्ज वापराबाबत रुग्णालयांचे संनियंत्रण असावे. वापराबाबत संपूर्ण अभिलेख अद्ययावत असला पाहिजे. कुठल्या रुग्णाला इंजेक्शन दिले, त्याचे नाव, पत्ता, इंजेक्शनचा बॅच क्रमांक यांच्या नोंदी ठेवाव्यात. रिकाम्या व्हायलवर त्या कुठल्या रुग्णासाठी वापरल्या, त्याचे नाव नोंदवून सुरक्षित ठेवाव्यात. दर आठवड्याला याबाबतचा अहवाल अन्न व औषध प्रशासनाला सादर करावा.
प्रशासनाशी संपर्क साधा
कुठेही याप्रकारचे औषध, इंजेक्शन हवे असल्यास तात्काळ प्रशासनाशी संपर्क साधावा. त्यासाठी प्रशासन व रुग्णालयांचा व्हाॅट्सॲप ग्रुपही सुरू केला आहे. त्यामुळे मागणी नोंदवताच वेळेत पुरवठा केला जाईल. मात्र, परस्पर रुग्णांना चिठ्ठी देऊन इतरत्र शोधायला पाठवू नये. काळाबाजाराला उत्तेजन मिळेल अशी कुठलीही कृती करू नये. गरज असेल तेव्हा माहिती द्या. तात्काळ औषध मिळवून दिले जाईल, असे जिल्हाधिकाऱ्यांनी सांगितले.
बाॅक्स २
तीन रुग्णालयांना नोटीस
तीन रुग्णालयांनी रेकॉर्ड न ठेवणे तसेच विहित दरापेक्षा अधिक दर आकारल्याचे आढळल्याने नोटीस बजावण्यात आली. असे पुन्हा घडता कामा नये. रुग्णांची आर्थिक पिळवणूक होता कामा नये. प्रत्येक बाबीचा वस्तुनिष्ठ रेकॉर्ड रुग्णालयात उपलब्ध असावा. आवश्यकता असल्यास डेटा अपडेशनसाठी स्वतंत्र व्यक्तीची नेमणूक करावी. मात्र, सर्व तपशील अचूक असणे आवश्यक आहे, असेही त्यांनी सांगितले.