गजानन मोहोड
अमरावती: जिल्ह्यात तीन दिवसांत पाच तालुक्यांमध्ये जोरदार वादळासह झालेल्या अवकाळी पावसाने ४९७१ हेक्टरमधील गहू, कांदा व संत्रा पिकाचे मोठे नुकसान झाले आहे. या नुकसानाचे पंचनामे करण्याचे आदेश जिल्हाधिकारी पवनीत कौर यांनी दिले आहेत.
मार्च महिन्यापासून जिल्ह्यात सात वेळा अवकाळी पाऊस झालेला आहे. यामध्ये रब्बी पिकांसह भाजीपाला व फळपिकांचे मोठे नुकसान झाले आहे. जिल्ह्यात २ मे रोजी झालेल्या अवकाळीने ५२ घरांची पडझड झाली. याशिवाय भातकुली तालुक्यात ३.९२ हेक्टर, मोर्शीत ४१५० हेक्टर, दर्यापुरात २३ हेक्टर व अचलपूर तालुक्यात १०७ हेक्टरमध्ये नुकसान झाले. दुसऱ्याच दिवशी म्हणजे, ३ मे रोजी पुन्हा अचलपूर तालुक्यात २११ हेक्टर तसेच ४ तारखेला झालेल्या अवकाळीने मोर्शी तालुक्यात २१० व अचलपूर तालुक्यात २६५.६ हेक्टरमधील गहू, कांदा व भाजीपाला पिकांचे नुकसान झाल्याचा जिल्हा प्रशासनाचा प्राथमिक अंदाज आहे.