शॉर्ट सर्किटमुळे आग लागल्याची माहिती
तिवसा : तालुक्यातील आखतवाडा येथे मुस्लिम वस्तीत शनिवारी दुपारी १२.३० वाजता आग लागून पाच झोपड्या जळून खाक झाल्या. तिवसा अग्निशमन दलाच्या वाहनाने आग विझविण्यासाठी शर्थीचे प्रयत्न केले. मात्र आगीने रौद्ररूप धारण केल्याने घरातील सर्व साहित्य जळून गेल्याने पाचही कुटुंब उघड्यावर आले आहेत.
शेख जहीर शेख कादीर, अयुब शहा मनू शहा, इनायत खा नयुउल्ला खा, सय्यद नाझीम सय्यद नशीब, शेख इरफान शेख अब्दुल या पाच जणांच्या घराला आग लागल्याने त्यांचे घर पूर्णपणे जळून खाक झाले आहेत. हे सर्व कुटुंब मोलमजुरी करून उदरनिर्वाह करतात. त्यांच्या घरावरून गेलेल्या वीज तारांवरून शॉर्ट सर्किट झाल्याने त्याची ठिणगी एका घरावर पडली. पाहता पाहता आगीने पाच घरे कवेत घेतली. यात जीवनावश्यक वस्तूंसह कपडे जळून खाक झाले. माहिती मिळताच तिवसा नगरपंचायतचे अग्निशमन वाहनदेखील घटनास्थळी दाखल झाले. नगरपंचायतीचे कर्मचारी सूरज शापामोहन, निखिल वानखडे, राहुल वानखडे, गौरव सोनोने यांनी अग्निशमनाचे प्रयत्न केले.