अमरावती : वलगाव येथील किरकोळ व्यावसायिकांनी, तसेच फळ विक्रेत्यांनी अतिक्रमण केले आहे. त्यामुळे इतर वाहतुकीला अडथळा निर्माण होत आहे. त्यामुळे येथील ग्रामपंचायतीने स्थानिक नवीन व जुन्या बसथांबा येथील अतिक्रमण हटवावे, तसेच वाहतूक पोलिसांनी कारवाई करावी, अशी मागणी होत आहे.
------------------------------------------------------------
सायकलींना चारचाकीची धडक दोघे जखमी
अमरावती : दोन सायकलींना चारचाकी वाहनाने धडक दिल्याने, या अपघातात दोघे जखमी झाल्याची घटना गाडगेनगर ठाणे हद्दीतील रंगोली लॉन पुढे मंगळवारी घडली.
सायकलने पहाटेची रपेट करीत असलेले महेश शिवकुमार गुप्ता(४३, रा. विलासनगर) व त्यांचा मुलगा आर्यन यांना चारचाकी वाहनाने धडक दिली. एम एच २७ बी झेड ८८६४ क्रमांकाच्या या चारचाकीमुळे दोघेही जखमी झाले. या प्रकरणी गाडगेनगर पोलिसांनी अज्ञात चालकाविरुद्ध मंगळवारी कलम २७९,३३७ अन्वये गुन्हा नोंदविला.
-------------------------------------------------------------
मायानगर येथे महिलेला शिवीगाळ
अमरावती : मोबाइल टाॅवरला परवानगी देणारी स्वाक्षरी केल्याबद्दल एका महिलेला मायानगर येथे शिवीगाळ करण्यात आली, तसेच घातक शस्त्राचा धाक दाखविण्यात आला. या प्रकरणी राजापेठ पोलिसांनी सोमवारी संतोष पावडे, अक्षय पावडे, हर्ष पावडे व एका महिलेविरुद्ध भादंवि कलम २९४, ३५२, ५०६ (ब) ३४, ब अन्वये गुन्हा नोंदविला.
-----------------------------------------------------------------
प्रेमविवाहानंतर विवाहितेचा हुंड्यासाठी छळ
अमरावती : प्रेमविवाह करणाऱ्या पतीने लग्नानंतर माहेरहून पाच लाख रुपये आणण्याच्या मागणीसाठी पत्नीचा शारीरिक व मानसिक छळ केला, तिला घराबाहेर काढण्यात आले. नागपूर शहरातील बुटीबोरी येथे हा प्रकार घडला.
विवाहितेच्या तक्रारीवरून दिनेश पटेल (रा. गरगरणे लेआउट नागपूर) याच्याविरुद्ध कर्वेनगर पोलिसांनी भादंवि कलम ४९८ अ अन्वये गुन्हा नोंदविला.
----------------------------------------------------------------------
विदेशी मद्याची अवैध विक्री
अमरावती : मालवीय चौकातील एका सुवर्णकाराच्या दुकानाजवळ विदेशी मद्याची अवैध विक्री करीत असलेला आरोपी शेख शेख अजीज (५२, रा. लालखडी) याला दोन फेब्रुवारी रोजी शहर कोतवाली पोलिसांनी ताब्यात घेतले त्याची जामिनावर मुक्तता करण्यात आली. त्याच्याकडून पंधराशे रुपयांचा मुद्देमाल जप्त करण्यात आला आहे.
--------------------------------------------------------------------
छाया कॉलनीत इसमाची आत्महत्या
अमरावती : मूळचा धामणगाव रेल्वे तालुक्यातील पिंपळखुटा येथे रहिवासी असलेले नारायण रामदास गावंडे (५२, रा.कोल्हापुरी गेट पोलीस ठाण्याच्या हद्दीतील छायानगर) यांनी येथील भाड्याच्या घरी गळफास घेऊन आत्महत्या केली.
नारायण गावंडे यांचा २६ वर्षीय मोठा मुलगा शुभम याचा पाच महिन्यांपूर्वी विजेच्या धक्याने मृत्यू झाला होता, तेव्हापासून ते विमनस स्थित होते. २ फेब्रुवारी रोजी त्यांनी सहा ते सातच्या सुमारास घरातील शौचालयात गळफास घेतला. सूरज नारायण गावंडे २३ यांच्या फिर्यादीवरून कोल्हापुरीगेट पोलिसांनी आकस्मिक मृत्यूची नोंद घेतली आहे.
------------------------------------------------------------------------
पालाश लाइन येथे युवकाची आत्महत्या
अमरावती : गाडगेनगर पोलीस ठाण्याच्या हद्दीतील पलाश लाइन येथील योगेश अजय मराठे २८ या युवकाने घरी गळफास घेऊन सोमवारी आत्महत्या केली. या प्रकरणी पोलिसांनी आकस्मिक मृत्यूची नोंद घेतली आहे. आत्महत्येचे कारण पुढे आले नाही.