अमरावती : चार महिन्याच्या पावसाळ्यामुळे पुढे ढकलण्यात आलेल्या सहकार क्षेत्रातील ११६ संस्थांच्या निवडणुकीचा बिगूल वाजला आहे. ज्या टप्प्यावर २८ जून रोजी निवडणूक प्रक्रिया ३० सप्टेंबरपर्यंत पुढे ढकलण्यात आल्या होत्या. त्याच टप्प्यावरून ९ ऑक्टोबरपासून सुरू करण्याचे आदेश राज्य सहकारी निवडणूक प्राधिकरणाने मंगळवारी उशिरा दिले आहे.
सहकार क्षेत्रातील या सर्व संस्थांमध्ये मतदार यादीची प्रक्रिया सुरू असतानाच २८ जूनला सहकार विभागाचे आदेश धडकले होते. आता पावसाला संपल्यामुळे प्राधिकरणाचे आदेशाने पुढे ढकलण्यात आलेल्या त्या टप्प्यावरून ९ ऑक्टोबरपासून प्रक्रिया आरंभ होणार आहे.
यामध्ये अचलपूर, अमरावती, तिवसा, वरुड व मोर्शी तालुका खरेदी-विक्री संघासह ‘ब’ वर्गातील अमरावती मर्चंट को - ऑपरेटिव्ह बँक, वरूड येथील महात्मा फुले डिस्ट्रिक्ट अर्बन कॉ- ऑपरेटिव्ह बँक, येथील जिजाऊ कमर्शियल को - ऑपरेटिव्ह बँक व अन्य अशा ११६ सहकारी संस्थांमध्ये मतदार यादीची प्रक्रिया सुरु होत आहे.