अमरावती; महात्मा गांधी राष्ट्रीय ग्रामीण रोजगार हमी योजनेअंतर्गत जिल्ह्यात ८४० पैकी ६६१ ग्रामपंचायतीमध्ये २२६८ कामे सुरू आहे. या कामांवर ३६ हजार ९८३ एवढ्या मजूरांच्या हाताला काम देण्यात आले आहे. त्यांच्या मजुरी दहा रुपयांनी वाढ करण्यात आली आहे.
काेरोनाच्या संकट काळात सरकारने मजुरांच्या हाताला काम उपलब्ध करून दिले आहे. जिल्ह्यातील १४ तालुक्यातील ग्रामीण भागात महात्मा गांधी राष्ट्रीय ग्रामीण रोजगार हमी योजनेच्या माध्यमातून ३६९८३ मजुरांना रोजगार उपलब्ध झाला आहे. कोरोनामुळे अनेकांवर बेरोजगारीची कुऱ्हाड कोसळली आहे. या काळात मनरेगाअंतर्गत केल्या जाणाऱ्या कामामुळे ग्रामीण भागातील लोकांना मोठा आधार मिळाला आहे. सध्याच्या स्थितीत ग्रामपंचायत क्षेत्रात २२६८ तर यंत्रणाकडे ७८९ कामे सुरू आहेत.या दोन्ही कामांवर ४५९७८ मजूर कामांवर आहेत. जॉब कार्ड असलेल्या व्यक्तीने कामाची मागणी केल्यास प्रशासनाव्दारे मागेल त्याला काम उपलब्ध करून दिली जाते. जिल्ह्यातील ८४० ग्रामपंचायतींपैकी ६६१ ग्रामपंचायतींमध्ये कामे सुरू आहेत. सुरक्षित अंतराचे पालन करून आणि माॅक्स घालून ही कामे केली जात आहेत. सीसीटी, वनतळे, गाळ काढणे, रस्ते, घरकुल, समतल चर, दगडी बांध, माती बांध, रोपवाटिका व फळबाग लागवड वनीकरणाची कामे करण्यात आल्याने गावालाही फायदा होत आहे. विशेषता अनेक ठिकाणी गाळ काढण्याच्या कामांमुळे पाणीसाठवण क्षमता वाढत आहे.
बॉक्स
दिवसाला २४८ रुपये मजुरी
मजुरांना एका दिवसासाठी २४८ रुपये मजुरी दिली जाते. जिल्ह्यात मस्टर संपल्यानंतर आठ दिवसात मजुरांच्या खात्यात मजुरीची रक्कम थेट जमा करण्यात येते.त्यामुळे ग्रामीण भागातील नागरिकांकडून या योजनेला चांगला प्रतिसाद मिळू लागला आहे.
बॉक्स
तालुका मजूर कामे
अचलपूर ९८२ १३९
अमरावती ७६८ १४०
अंजनगाव ५१६ ११६
भातकुली ८४३ २४०
चांदूर रेल्वे ८३९ १५२
चांदूर बाजार ८५७ ११३
चिखलदरा २१९०९ ३१४
दर्यापूर ९१३ १९८
धामनगाव १५२ ०३३
धारणी ५४६८ २५०
मोशी १५४४ १३३
नांदगाव खं ६८७ १३२
तिवसा ४०२ ९२
वरूड १००३ २१६