अमरावती : संत गाडगेबाबा यांचे जन्मस्थान शेंडगावबरोबरच त्यांची कर्मभूमी ऋणमोचन, नागरवाडी, वलगाव (अमरावती) येथेही संयुक्त आराखड्यातून विकासकामे पूर्ण केले जातील. तेथे निधीची कमतरता पडू देणार नाही, अशी ग्वाही पालकमंत्री यशोमती ठाकूर यांनी रविवारी शेंडगाव येथे दिली.
श्री संत गाडगेबाबा यांचे जन्मस्थान असलेल्या शेंडगाव या तीर्थक्षेत्राच्या विकास आराखड्यातील कामांच्या भूमिपूजनप्रसंगी ना. ठाकूर बोलत होत्या. खासदार नवनीत राणा, जिल्हा परिषद अध्यक्ष बबलू देशमुख, माजी राज्यमंत्री तथा आमदार प्रवीण पोटे, आमदार बळवंतराव वानखडे, जिल्हा परिषद उपाध्यक्ष विठ्ठलराव चव्हाण, माजी आमदार रमेश बुंदिले, बाळासाहेब हिंगणीकर, हरिभाऊ मोहोड, सुधाकरराव भारसाकळे, गाडगेबाबा मिशनचे मधुसूदन मोहिते आदी यावेळी उपस्थित होते.
विकास आराखड्यात नियोजित कामांसह इतरही आवश्यक कामांचा समावेश केला जाईल. संत गाडगेबाबांची कर्मभूमी असलेल्या सर्व गावांचा संयुक्त आराखड्यातून विकास करण्यात येईल. संत गाडगेबाबांनी मानवतावादाची शिकवण दिली व अंधश्रद्धा नाकारल्या. ते थोर कर्मयोगी होते. त्यामुळे आपणही बाबांची खरी शिकवण अंगीकारली पाहिजे व पूजा अर्चा आदी टाळून कृतीवर भर दिला पाहिजे. संत गाडगेबाबा मिशनमध्ये सदस्यपद मिळणे हा आपल्यासाठी सर्वोच्च बहुमान आहे, असेही पालकमंत्री म्हणाल्या.
बॉक्स
१८.६३ कोटींतून १० महिन्यांत कामे होणार
विकास आराखड्यात १८.६३ कोटी निधीतून धर्मशाळा बांधकाम, श्री संत गाडगेबाबा स्मृती भवन, बहुउद्देशीय सभागृह, न्याहारी भवन, आर्ट गॅलरी, ग्राम सफाई अभियान प्रशिक्षण केंद्र, विद्युतीकरण, सिमेंट रस्ते, घाटाचे बांधकाम, प्रसाधनगृह आदी कामांचा समावेश आहे. १० महिन्यांत ही कामे पूर्ण करण्याचे नियोजन असल्याचे पालकमंत्र्यांनी सांगितले.