अमरावती : कोरोनाचा ग्राफ माघारताच डेंग्यूचे २५, चिकनगुण्या ०२ व मलेरियाच्या ०६ रुग्णांची नोंद झालेली आहे. शहरातील आऊटस्कड भागात स्वच्छतेची वाट लागल्याने डासांची उत्पत्ती अन् अच्छाद वाढला आहे. आरोग्य व स्वच्छता यंत्रणेच्या कमालीच्या दुर्लक्षामुळे दिवसागणिक रुग्णसंख्या वाढण्याची भीती निर्माण झालेली आहे.
जिल्हा हिवताप अधिकाऱ्यांच्या माहितीनुसार २५२ नमुन्यांच्या तपासणीत अचलपूर व चांदूर बाजार तालुक्यांत प्रत्येकी एक चिकनगुण्या रुग्णांची नोंद झालेली आहे. डेंग्यूसारखाच असला तरी चिकनगुण्याचा आजार अनेक दिवस कायम राहतो. हा ताप बरा झाल्यानंतरही त्याचे दुष्परिणाम नंतरही होत असल्याने रुग्ण जेरीस आले आहेत. जिल्हाभरात डेंग्यूचे २५ रुग्ण आढळले आहेत. २५२ रक्तजल नमुने तपासणीकरिता पाठविले होते. यामध्ये अचलपूर तालुक्यात ७, चिखलदरा ६, अमरावती ३, चामदूर बाजार ४, नांदगाव खंडेश्वर २, चांदूर रेल्वे १ व तिवसा तालुक्यात एक मलेरियाचे १,३६,०८६ नमुन्यांची तपासणी केली असता सहा रुग्ण पॉझिटिव्ह आढळून आले आहेत. हे सर्व आजार डासांपासून होत असल्याने नागरिकांनी घराच्या आसपास डासांची उत्पत्ती होणार नाही, याची काळजी घेणे महत्त्वाचे आहे. महापालिका क्षेत्रात स्वच्छतेकडे कमालीचे दुर्लक्ष होत आहे. बेपर्वा कर्मचारी अन् कंत्राटदार यांच्यावर कुणाचाही अंकुश नसल्याने याचा थेट फटका सर्वसामान्य नागरिकांच्या आरोग्याला बसत आहे.
बॉक्स
प्रत्येक व्यक्तीमध्ये डेंग्यूची लक्षणे वेगळी
डोकेदुखी, अंगदुखी व सौम्य ताप असतो. काही प्रकरणात गंभीर लक्षणे दिसून येतात. रक्तदाब कमी होणे, रक्ताच्या प्लेटलेटमध्ये कमी येणे याशिवाय १०४ पर्यंत ताप, स्नायू, हाडे आणि सांधेदुखी, मळमळणे, उलट्या होणे, डोळ्यांच्या मागे वेदना होतात, काही रुग्ण एका आठवड्यात बरे होतात, तर काहींमध्ये तीव्र लक्षणे दिसतात.
बॉक्स
तीव्र सांधेदुखी चिकनगुण्याचे लक्षण
या रोगाची लागण होताच थंडी वाजून ताप येणे, उलटी होणे, अन्नावरची इच्छा कमी होणे, डोके दुखणे यापैकी कोणतेही एक लक्षण या आजारात ठळकपणे दिसून येतात. काहीवेळा अंगावर पुरळदेखील येतात. सांधेदुखीमुळे रुग्णाला फार चालताना त्रास होतो. रक्ताची चाचणी करून चिकुनगुण्याचे निदान केले जाते. याशिवाय अन्य चाचण्या करूनही या आहाराचे निदान केले जातात. काही रुग्ण आठवडाभरात बरे होतात. काही रुग्णांना दोन ते तीन महिन्यांचा कालावधी लागत असल्याचे आरोग्य विभागाने सांगितले.
बॉक्स
प्रतिबंधात्मक उपाययोजना महत्त्वाच्या
डासांपासून बचाव करणे हा या रोगाचा मुख्य उपाय आहे. चिकुणगुण्या पसरविणारे डास हे प्रामुख्याने सकाळी व दुपारच्या वेळी फिरतात, त्या काळात शिफारस केलेल्या औषधांची फवारणी करावी. घराचा परिसर स्वच्छ ठेवून कुठेही डासांची उत्पत्ती होणार नाही, याची काळजी घ्यावी. आजार औषधांसह अंगभूत रोगप्रतिकारशक्तीमुळे बरा होतो. यासाठी पुरेशी विश्रांती, द्रवरूप आहार व वेदनाशामक औषधी घेतल्यास रुग्ण लवकर बरा होतो.
बॉक्स
तापाच्या आजारात लक्षणे समान
तापांमुळे होणाऱ्या आजारांत जवळपास अनेक लक्षणे सारखीच आहे. मलेरियात थंडी वाजून ताप येणे, राहून राहून ताप येणे, डोकेदुखी, मळमळ, उलटी होणे, पोटदुखी, हगवण, अतिसार, अंगदुखी, शरीरात वेदना होणे, सांध्यामध्ये वेदना होणे, नाडीची गती जलद होणे यासारखी लक्षणे दिसून येतात. रुग्णांची तपासणी करून यकृत व लिव्हरचा आकार वाढला आहे का, याची तपासणी केली जाते व रक्ताची चाचणी करून निदान केले जाते.