----------------------------------------------------------------------
सीपींच्या विशेष पथकाने ११ गोवंश पकडली
५ लाख ९६ हजारांचा मुद्देमाल जप्त, दोन आरोपी पसार ( फोटो आहे. )
अमरावती : नागपुरी गेट ठाण्याच्या हद्दीतील लालखडी परिसरात पोलीस आयुक्तांच्या विशेष विशेष पथकाने वाहनाची तपासणी केल्यानंतर, या वाहनाचा पाठलाग करून अलीमनगरात आठ गाई व तीन बैल पकडले. ९६ हजार रुपये किमतीची ही जनावरे आहेत. सदर कारवाई सोमवारी दुपारी करण्यात आली. दाटीवाटीने कोंबल्याने एका पशूचा मृत्यू झाला.
पोलीस सूत्रांनुसार, पथक लालखडी परिसरात गस्त घालत असताना एमएच ०५ बीएन १६४८ क्रमांकाच्या पिकअप वाहनाने जनावरांची वाहतूक होत असल्याची माहिती मिळाली. वाहन थांबविण्याचा प्रयत्न केला असता, चालकाने एमएच २७ एए ५०२ क्रमांकाच्या शासकीय वाहनाला फिल्मी स्टाईल धडक दिली व तेथून पळून गेला. मात्र, पोलिसांनी पुन्हा त्या वाहनाचा पाठलाग केला. वाहनाला अलीमनगरातील सुन्नी मशीदच्या मागे पकडण्यात आले. पोलिसांना बघताच चालकासह दोन जण पळून गेले. ही कारवाई सहायक उपनिरीक्षक पंकज चक्रे व इतर पोलीस अंमलदारांनी केली. पुढील तपास नागपुरीगेट पोलीस करीत आहेत.