वृक्षसंवर्धनाची घेतली शपथ, भाजप शहर, महिला आघाडीचा उपक्रम
धामणगाव रेल्वे : भाजपचे ज्येष्ठ नेते तथा माजी आमदार अरुण यांच्या मार्गदर्शनात शहर व महिला आघाडीच्यावतीने कोरोनायोद्ध्यांचा सन्मान करण्यात आला. यादरम्यान धामणगाव, चांदूर रेल्वे व नांदगाव खंडेश्वर तालुक्यातील ग्रामपंचायतींमध्ये वृक्षारोपण करण्यात आले तसेच वृक्षसंवर्धनाची शपथ घेण्यात आली.
भाजप शहर व महिला आघाडीच्यावतीने स्थानिक संत गजानन महाराज मंदिरात महाआरती करण्यात आली. यानंतर दोन तपांपासून शहरातील रुग्णांना सेवा देणारे डॉ. प्रकाश राठी व डॉ. शोभा राठी या दाम्पत्याचा सन्मान करण्यात आला. यावेळी भाजप शहराध्यक्ष गिरीश भुतडा, महिला आघाडीच्या शहराध्यक्ष नलिनी मेश्राम, जिल्हा उपाध्यक्ष उषा तिनखेडे, अशोक शर्मा, माजी नगराध्यक्ष अर्चना राऊत, शुभकरण कांकरिया, नगरपालिकेचे बांधकाम सभापती सुनील जावरकर, नगरसेवक विनोद धुवे, सीमा देवतळे, अर्चना गोडबोले, विद्या राऊत, रीता बोरगावकर, चंदू पाटील, विनोद तिरीले, गज्जू रॉय, सुनील शिंदे यांची उपस्थिती होती.