अमरावती : कोविड पॉझिटिव्ह म्हणून रुग्णालयात उपचारार्थ दाखल झाल्यावर मेंदूज्वर व इतर आजारांची लक्षणे आढळून आलेल्या विद्यार्थिनीवर आरोग्य विभागाच्या कार्यतत्पर उपचाराने तिला पुनर्जन्म मिळाला आहे.
उपचारादरम्यान ही विद्यार्थिनी १५ दिवस कोमात होती. डॉक्टरांच्या देखरेखीत ऑक्सिजन पुरवठा, प्रयोगशाळेत विविध तपासण्या व त्यानुसार तत्पर औषधोपचाराने ती पूर्णत: बरी झालेली आहे. आपल्या लेकीला पुनर्जन्म मिळाल्याने वैद्यकीय सेवा देवदूत ठरल्याची प्रतिक्रिया तिच्या कुटुंबीयांसह नागरिकांकडून व्यक्त होत आहे. नेहा ही इयत्ता दहावीची विद्यार्थिनी आहे. काही दिवसांपूर्वी घरी अचानक भोवळ येऊन कोसळली. कुटुंबीयांनी तिला उपचारार्थ डॉक्टरांकडे आणले. त्यावेळी तिला सुपरस्पेशालिटी हॉस्पिटलमध्ये भरती करण्याचा सल्ला डॉक्टरांनी दिला. तिची गंभीर प्रकृती लक्षात घेऊन सुपरस्पेशालिटी रुग्णालयाच्या स्टाफने तत्काळ उपचार सुरू केले. नेहाला कोरोनाची बाधा झाल्याचे आढळल्याने प्रथमत: तिच्यावर उपचार करण्यात आले.
दरम्यान, तिचा ताप १०४ डिग्रीपर्यंत वाढला होता. हे लक्षात घेऊन मेंदूचे सिटी स्कॅन, तसेच मेंदू व पाठीतील पाण्याची प्रयोगशाळेत तपासणी करण्यात आली. तपासणी अंती मेंदूज्वर या आजाराचे निदान झाले आणि उपचार करण्यात आले. नेहा सलग १५ दिवस कोमात होती. अशा स्थितीतही डॉक्टरांनी प्रयत्नांची पराकाष्ठा करीत तिला कोमातून बाहेर काढले. सद्यस्थितीत तिची प्रकृती सुधारलेली आहे.
कोट
कोविडबाधित व मेंदूज्वरासह इतर आजारांची लक्षणांमुळे कोमात गेलेली बालिका पूर्णत: बरी झाली आहे. डॉक्टर, पारिचारिका व इतर स्टाफच्या एकत्रित प्रयत्नांतून तिला पुनर्जन्म मिळाला आहे.
- डॉ. श्यामसुंदर निकम,
जिल्हा शल्य चिकित्सक
बॉक्स
सुपरस्पेशालिटीमधून मिळाला डिस्चार्ज
नेहला शनिवारी सुपरस्पेशालिटी हॉस्पिटलमधून घरी परतण्याची परवानगी मिळाली. येथील स्टाफने तिच्या कुटुंबीयांच्या उपस्थितीत तिला आरोग्यदायी जीवनासाठी शुभेच्छा दिल्या. जिल्हा शल्य चिकित्सक डॉ. श्यामसुंदर निकम यांच्या मार्गदर्शनात डॉ. रवी भूषण, डॉ. नीलेश पाटील, डॉ. पूनम सोलंकी, डॉ. श्रेया चेरडे, डॉ. करिश्मा जयस्वाल व डॉ. स्नेहल अतकरी या डॉक्टरांच्या टीमने नेहावर यशस्वी वैद्यकीय उपचार केले.