नाल्याच्या पुरात बैलबंडी उलटली, वृद्ध शेतकरी ठार

श्रावण लांजेवार (७०) असे मृत शेतकऱ्याचे नाव आहे. श्रावण हे गावाशेजारच्या पाच एकर शेतीत दुपारी बैलबंडी घेऊन गेले होते. या परिसरात दुपारी २ ते ४ वाजतापर्यंत संततधार पावसाने हजेरी लावल्याने रामगाव पांदण रस्त्याच्या नाल्याला अचानक पूर आला. पुरातून बैलबंडी काढताना पलटी झाली. दोन्ही बैल पळून घरी आले. मात्र, श्रावण लांजेवार हे घरी न आल्यामुळे त्यांचा नातू मंगेश याने शोधाशोध केली. त्यातच रामगाव पांदण रस्त्याच्या नाल्यात वाहून गेलेल्या पुरात बंडीच्या खाली आजोबाचा मृतदेह दिसला. येथील सरपंच रुपेश गुल्हाने व माजी सभापती पंकज वानखडे यांनी घटनास्थळी धाव घेतली. चांदूर रेल्वे पोलिसांना माहिती देण्यात आली. एक तासानंतर मृत श्रावण लांजेवार यांचा मृतदेह आढळला. त्यांच्यामागे मुलगा, तीन मुली असा आप्तपरिवार आहे.