बोगस डॉक्टरांचा सुळसुळाट

आठ-दहा वर्षांपासून परिसरातील आदिवासी भागात कोणत्याही प्रकारची वैद्यकीय पदवी नसणाऱ्या बंगाली बोगस डॉक्टरांचा ...

आदिवासींच्या जीवाशी खेळ : ना कोणती पदवी ना कुठली शाश्वती अरूण पटोकार पथ्रोट आठ-दहा वर्षांपासून परिसरातील आदिवासी भागात कोणत्याही प्रकारची वैद्यकीय पदवी नसणाऱ्या बंगाली बोगस डॉक्टरांचा सुळसुळाट झाला आहे. त्यांनी स्थानिक व आदिवासी भागातील भोळ्याभाबड्या आदिवासी बांधवाची आर्थिक लूट करण्यासोबतच त्यांच्या जिविताशीही खेळ चालविला आहे. जास्त भावाने स्वत: जवळचे गोळ्या औषध व सलाईन देवून आदिवासींची फसवणूक पुरुष गब्बर बनले आहेत. या बिनडिग्री बोगस डॉक्टरांच्या उपचारामुळे आदिवासी खेड्यामध्ये अनेक रुग्ण दगावल्याच्या घटनाही घडल्या आहेत. मात्र आदिवासी मंडळींना याबाबत काही अनुभव व अनभिज्ञ असून रुग्ण आजाराने दगावला असे चित्र या बोगस डॉक्टरकडून उभे करून रुग्णांच्या घरच्यांची समजूत काढून त्यावर पडदा टाकण्याचे काम या बोगस डॉक्टरांकडून सतत केले जाते. सद्या पावसाळ्याचे दिवस जवळ आले असून काही अती तापमान तर कधी केवळ पावसाचे वातावरण अशा परिस्थितीत हवामानात झालेल्या बदलाने अतिसार, मलेरिया, डेंग्यू यासारखे आजार दिसू लागले आहेत. अतिदुर्गम भागातील आदिवासींना परतवाडा, अंजनगाव, पथ्रोट हे अंतर लांब असल्याने आणि आर्थिक परिस्थिती बिकट असल्यामुळे ते जवळच्याच झोलाछाप बोगस डॉक्टरकडून उपचार करून घेतात परंतु या डॉक्टरकडे कोणत्याच प्रकारची पदवी (डिग्री) किंवा उपचाराचे विधीवत प्रशिक्षण नसतानाही ते सलाईन आणि जड इंजेक्शनचा वापर करून रुग्णांची फसवणूक करीत आहे. यामध्ये दरवर्षी कितीतरी रुग्णांना आपला जिव गमवावा लागतो. जिल्हाधिकारी किरण गित्ते यांनी बोगस डॉक्टरवर कार्यवाही करण्याचे संबंधितांना आदेश दिल्यामुळे परिसरातील बोगस डॉक्टर जोपर्यंत शासनाची कडक कार्यवाही होणार नाही तोपर्यंत यांच्या बोगस प्रॅक्टीसला व फसवणुकीला आळा बसणार नाही व आदिवासींच्या जिवाशी खेळणारा खेळ थांबणार नाही. या अगोदर याबाबत काही खेड्यातील सुज्ञ नागरिकांनी अनेक तोंडी तक्रार केल्या. मात्र बोगस डॉक्टरवर थातूरमातूर कार्यवाही व पोलिसांना चिरीमिरी देऊन आपला बोगस व्यवसाय आजपर्यंत चालूच ठेवला आहे. यावर कुठेतरी अंकुश लावणे काळाची गरज आहे. काही डॉक्टर हे आपल्या घरातील दवाखान्यामध्ये दैनंदिन वापरण्यात येणार उपकरणे ठेवत नसून गाडीवर बसून उपकरणे बॅगेमध्ये ठेवून आदिवासी भागामध्ये फिरून आपला गोरखधंदा चालवितात. त्यांचे साहित्य जप्त करुन त्यांचेवर कडक कारवाई करावी, अशी नागरिकांची मागणी आहे. याबाबत जिल्हाधिकाऱ्यांनी लक्ष देण्याची मागणीही आहे. अनेक दिवसांपासून सुरू आहे गोरखधंदाजिल्हाधिकारी किरण गित्ते यांनी जिल्ह्यात आवश्यक वैद्यकिय पात्रता नसणाऱ्या बोगस डॉक्टरांवर कारवाई करण्याचे आदेश दिल्याने काही ठिकाणी बोगस डॉक्टरांना तात्काळ अटक करण्यात आली. परंतु पथ्रोट परिसरात गेल्या अनेक दिवसांपासून आपले बस्तान मांडून असलेले परप्रांतीय बोगस डॉक्टर मात्र रुग्णांच्या जीवाशी खेळ करीत आहे. हा प्रकार धक्कादायक असून गोरगरिब रुग्णांचाजीव जाण्याची शक्यता आहे. त्यामुळे अशा बोगस डॉक्टरांवर कारवाईची मागणी होत आहे.