चांदूर रेल्वे : तालुक्यातील मांजरखेड (कसबा) येथील एका शेतशिवारातील वाकलेला विद्युत पोल जीवघेणा ठरू शकतो. त्याअनुषंगाने तेथे नव्याने विद्युत खांब उभारावा, अशी मागणी प्रहार जनशक्ती पक्षाचे उपजिल्हाप्रमुख सौरभ इंगळे यांनी महावितरण कंपनीच्या अभियंत्यांकडे केली आहे.
-----------------------------
देवस्थान मार्गाचे काँक्रिटीकरण रखडले
अंजनगाव बारी : कित्येक वर्षांपासून मंजूर असलेल्या रामगीर महाराज देवस्थान मार्गाचे काँक्रिटीकरण अद्यापही झालेले नाही. सात वर्षांपासून हा रस्ता मुख्य मार्गापासून रामगीर महाराज देवस्थानपर्यंत पूर्ण झालेला नाही. या रस्ता बांधकामादरम्यान नाला येत असून त्याठिकाणी पुलही होणार होता. तत्कालीन ग्रामपंचायत प्रशासनाने कामाला स्थगिती दिली. मग रस्ता बांधकामाचा निधी गेला तरी कुठे? असा सवाल नागरिकांनी उपस्थित केला आहे.
----------------------
हिवरखेड परिसरात रेतीचे अवैध उत्खनन
हिवरखेड : मोर्शी पोलीस ठाण्यांतर्गत हिवरखेड व परिसरात तस्करांनी रेतीच्या अवैध उत्खननाचा व वाहतूकीचा गोरखधंदा चालविला आहे. बेकायदा वाळूसह सट्टा पट्टी, अवैध गावठी दारू भट्टयादेखील फोफावल्या आहेत. प्लास्टिक पन्नीत व मोठ-मोठ्या टयुबमध्ये गावठी दारू मध्यप्रदेश सीमेवरून हिवरखेड तसेच परिसरात आणली जाते.
-------------
विवाहितेचा विनयभंग, पतीला धमकी
अंजनसिंगी : तळेगाव दशासर पोलीस ठाण्याच्या हद्दीतील एका २५ वर्षीय विवाहितेला शारिरिक संबंधांसाठी बळजबरी करून तिचा विनयभंग करण्यात आला. ३१ जानेवारी रोजी ही घटना घडली. वाच्यता केल्यास पीडिताच्या पतीला जिवाने मारण्याची धमकी देण्यात आली. याप्रकरणी तळेगाव पोलिसांनी आरोपी सुरेश पंडित (ह.मु. सुलतानपूर, नांदगाव खंडेश्वर) विरुद्ध गुन्हा दाखल करण्यात आला.
-------------------------
धारणमहू येथे महिलेला मारहाण
धारणी : तालुक्यातील धारणमहू येथील एका ४५ वर्षीय महिलेला तिने चिजवस्तू आणण्यासाठी पैसे मागितले म्हणून मारहाण करण्यात आली. ३१ जानेवारी रोजी पहाटे ही घटना घडली. याप्रकरणी धारणी पोलिसांनी आरोपी कमलसिंग भुरासिंग धुर्वे (रा. धारणमहू) याचेविरूद्ध गुन्हा दाखल केला.
-----------------
वाहनाच्या धडकेत तरुण गंभीर
दर्यापूर : अमरावती रोडवरील एका मंगल कार्यालयासमोर भरधाव वाहनाच्या धडकेत नीलेश गोकुळ मराठे (२८, रा. देवपूर) हे गंभीर जखमी झाले. आपले एमएच ०१ सीआर ६९०४ हे मालवाहू वाहन रस्त्याच्या कडेला उभे करून लघुशंकेसाठी जात असताना पाठीमागून येणाऱ्या एमएच २७ सीपी ७३५३ या वाहनाने त्यांना धडक दिली. दर्यापूर पोलिसांनी त्या वाहनचालकाविरूद्ध गुन्हा नोंदविला.
----------------
विवाहितेला घराबाहेर काढून मारहाण
भातकुली : तालुक्यातील ढंगारखेडा येथील एका २४ वर्षीय विवाहितेला माहेरहून ५० हजार रुपये आणण्याचा तगादा लावत घराबाहेर काढण्यात आले. समजावण्यासाठी आलेल्या तिच्या वडिलांनादेखील हाकलून लावण्यात आले. ४ ऑक्टोबर २०२० रोजी हा प्रकार घडला. याप्रकरणी खोलापूर पोलिसांनी १ फेब्रुवारी रोजी नीलेश धुरंधर, नितेश धुरंधर व दोन महिला (सर्व रा. ढंगारखेडा) यांचेविरुद्व गुन्हा दाखल करण्यात आला.
-------------
कोदोरी येथे गाईला विळा मारला
नांदगाव खंडेश्वर : तालुक्यातील कोदोरी मारूफ येथील नीलेश मोहकर यांच्या गाईला डाव्या बाजूला विळा मारून जखमी केले. ३१ जानेवारी रोजी सायंकाळी ही घटना घडली. नांदगाव खंडेश्वर पोलिसांनी गावातीलच एका ५० वर्षीय महिलेविरुद्ध गुन्हा दाखल केला.
---------------
तिवरा येथे महिलेला मारहाण
अंजनसिंगी : धामणगाव रेल्वे तालुक्यातील तिवरा येथील एका ४० वर्षीय महिलेला दगडाने मारहाण करण्यात आली. १ फेब्रुवारी रोजी दुपारी ही घटना घडली. याप्रकरणी तळेगाव पोलिसांनी तिवरा येथील एका अल्पवयीन मुलीविरूद्ध गुन्हा दाखल केला.
--------------
मांडवा येथून दुचाकी लंपास
चांदूररेल्वे : तालुक्यातील मांडवा येथील राजेश दिघाडे यांच्या घरातून एमएच २७ व्ही ६१५९ या क्रमांकाची दुचाकी लंपास करण्यात आली. २० जानेवारी रोजी रात्री ही घटना घडली. चांदूररेल्वे पोलिसांनी याप्रकरणी १ फेब्रुवारी रोजी अज्ञात आरोपीविरूद्ध गुन्हा दाखल करण्यात आला.
-----------------
अल्पवयीन मुलीचा विनयभंग
चिखलदरा : तालुक्यातील एका अल्पवयीन मुलीचा विनयभंग करण्यात आला. शिवीगाळ करून जीवे मारण्याची धमकी देण्यात आली. १ फेब्रुवारी रोजी दुपारी ही घटना घडली. याप्रकरणी चिखलदरा पोलिसांनी आरोपी सागर अनिल तिवारी (२९, गवळीपुरा) याचेविरूद्ध गुन्हा दाखल करण्यात आला.
-------------
एकतानगरात महिलेला मारहाण
परतवाडा : कांडलीमधील एकतानगर येथे एका २४ वर्षीय महिलेला मारहाण करण्यात आली. १० नोव्हेंबर २०२० रोजी ही घटना घडली. परतवाडा पोलिसांनी याप्रकरणी १ फेब्रुवारी रोजी आरोपी अमिरोद्दीन काली, जमिरूद्दीन, कदिरूद्दीन (सर्व रा. एकतानगर) यांचेविरूद्ध गुन्हा दाखल केला.
--------------
चारचाकीच्या धडकेत दुचाकीस्वार ठार
परतवाडा : अंजनगाव मार्गावरील गडकी फाट्याजवळ चारचाकी वाहनाने दिलेल्या धडकेत दुचाकीस्वार दीपक जावरकर यांचा मृत्यू झाला. अनिकेत टेकाडे (भैसदेही) व एक मुलगी जखमी झाली. २८ जानेवारी रोजी हा अपघात घडला. याप्रकरणी परतवाडा पोलिसांनी एमएच ३० एझेड ५०२० या चारचाकीच्या चालकाविरुद्ध गुन्हा दाखल केला.
--------
पुर्ववैमनस्यातून चुलतभावाच्या डोक्यावर दगड हाणला
वरूड : पुर्ववैमनस्यातून चुलतभावाच्या डोक्यावर दगड मारून गंभीर जखमी केल्याची घटना ३१ जानेवारी रोजी रात्री ९.३० च्या सुमारास टेंभुरखेडा येथे घडली. याप्रकरणी जखमी मदन मांजरीवार (रा. टेंभुरखेडा) यांच्या तक्रारीवरून वरूड पोलिसांनी आरोपी दुर्गेश लखन मांजरीवार (रा. करजगाव, वरूड) विरूद्ध गुन्हा नोंदविला.
---------
दहसूर येथील विवाहितेचा छळ
मोर्शी : तालुक्यातील दहसूर येथील एका ३१ वर्षीय विवाहितेचा शारिरिक व मानसिक छळ करण्यात आला. याप्रकरणी मोर्शी पोलिसांनी १ फेब्रुवारी रोजी आरोपी अमोल नवंगे व दोन महिला (रा. दहसूर) यांचेविरुद्ध गुन्हा दाखल केला.
----------