फोटो
परतवाडा : बहिरमची यात्रा नव्या वर्षात भरणार असून, त्याकरिता जिल्हाधिकाऱ्यांना विभागीय आयुक्तांकडून मान्यता घ्यावी लागणार आहे. जिल्ह्यासह अमरावती विभागातील यात्रा, उत्सव आयोजित करण्यास परवानगी देण्याबाबतचा शासननिर्णय, राज्याच्या आपत्ती व्यवस्थापन विभागाच्या संचालकांनी २४ डिसेंबरला निर्गमित केला आहे.
यात्रा, उत्सव आयोजित करण्यास परवानगी देण्याबाबत हा शासनाचा सकारात्मक निर्णय राज्यातील सर्व विभागीय आयुक्तांसह जिल्हाधिकाऱ्यांना पाठविण्यात आला आहे. कोविड-१९ च्या प्रादुर्भावाच्या अनुषंगाने नागरिकांसाठी पालन करावयाची आवश्यक ती मानद कार्यप्रणाली लक्षात घेण्यास या २४ डिसेंबरच्या निर्णयात सुचविण्यात आले आहे.
राज्यात यात्रा, उत्सवांना सुरुवात झाली आहे. १४ ऑक्टोबरच्या शासन आदेशान्वये राज्यातील धार्मिक स्थळे, प्रार्थना स्थळे सुरु करण्यात अनुमती देण्यात आली आहे. केंद्रीय गृह मंत्रालयाचे २९ ऑगस्टचे आदेशही निर्गमित आहेत. राज्याच्या विविध भागांतून यात्रा, उत्सवास परवानगी देण्याबाबत प्रस्ताव प्राप्त होत आहेत. जिल्हाधिकाऱ्यांनी विभागीय आयुक्तांच्या मान्यतेने त्या-त्या जिल्ह्यातील यात्रा, उत्सव आयोजित करण्यास परवानगी देण्याबाबत निर्णय घ्यावा, असे २४ डिसेंबरच्या निर्णयात (आदेशात) स्पष्ट करण्यात आले आहे.
दरम्यान, राज्यात सर्वाधिक दिवस चालणारी व २० डिसेंबरपासून सुरू होणारी बहिरम यात्रा यंदा कोरोनाच्या अनुषंगाने पहिल्यांदा रद्द करण्यात आली. यात्रा परिसरात हंडीतील भाजी आणि रोडग्याच्या जेवणालाही मनाई केली गेली. राहुट्या टाकण्यासही मज्जाव केल्या गेला. यामुळे अनेक व्यावसायिकांचा रोजगार बुडाला. रोजगाराचा प्रश्न निर्माण झाल्यावरून यात्रा परिसरातील, लगतच्या पंचक्रोशीतील लोकांनी, युवकांनी, राजकीय लोकप्रतिनिधींनी यात्रा सुरू करण्यात यावी, यात्रा परिसरात व्यावसायिकांना दुकाने लावण्यास अनुमती देण्यात यावी, या मागणीचे निवदेन मुख्यमंत्र्यांना दिले. जिल्हाधिकाऱ्यांशी संवाद साधला. चक्काजामची तयारीही चालविली होती. बहिरम यात्रा सुरू करण्याबाबत ३१ डिसेंबरनंतर बघू. शासनस्तरावरून नव्याने काही मार्गदर्शक सूचना आल्यास यात्रा सुरू करण्यावर विचार करु, असे जिल्हाधिकाऱ्यांनी संबंधितांशी बोलताना स्पष्ट केले होते.
बॉक्स
जिल्हाधिकाऱ्यांच्या आदेशाची प्रतीक्षा
यात्रा, उत्सव आयोजनाच्या अनुषंगाने शासनाचा २४ डिसेंबरचा आदेश बहिरम यात्रेकरिता प्रयत्न करणाऱ्यांकडून व्हायरल केल्या जात आहे. ‘जमलं गड्या’ म्हणत जिल्हाधिकाऱ्यांच्या नव्या आदेशाच्या प्रतीक्षेत ते आहेत. बहिरम यात्रा फेब्रुवारी अखेरपर्यंत सुरू ठेवण्याचा मनोदयही त्यांच्याकडून व्यक्त केल्या जात आहे. व्यावसायिक, यात्रेकरू, पर्यटक व भाविकांच्या आशा पल्लवीत झाल्या आहेत.