अमरावती : अचलपूर सहायक निबंधकाच्या पथकाने मंगळवारी येथील अवैध सावकाराच्या घरी धाड घातली. यामध्ये अनेक नियमबाह्य दस्तऐवज जप्त करण्यात आले.सहायक निबंधक अ.श.उल्हे यांच्याकडे परतवाडा शहरातील किसन शर्मा नामक व्यावसायिक भिशीच्या नावावर अवैध सावकारी करीत असल्याची तक्रार दाखल झाली. या अनुषंगाने त्यांनी कार्यालयातील दहा अधिकारी-कर्मचाऱ्यांच्या साह्याने श्याम टॉकीजलगत गुजरीबाजार स्थित त्या पोलीस बंदोबस्तात व्यावसायिकाच्या घराची झडती घेतली. किसन शर्मा यांच्यासह घरातील सदस्यांची त्यांनी चौकशी केली. तक्रारीच्या अनुषंगाने माहिती घेतली. चौकशी आटोपताच त्यांच्याकडे असलेले दस्तावेज पथकाने जप्त केले. नेमकी तक्रार काय, जप्त केलेल्या दस्तावेजात काय दडले आहे, याविषयी एआर कार्यालय कमालीची गोपनीयता बाळगून आहे. एआर उल्हे बुधवारी फोनवर उपलब्ध झाले नाहीत. किशन शर्मा यांनी काही दिवसांपूर्वीच सावकारी परवाना मिळविल्याची माहिती आहे.