नांदगाव खंडेश्वर/ अमरावती : प्रेमप्रकरणातून महिला, मुलीच्या विनयभंगाचे प्रकार समाजात नवीन नाहीत. ब्रेकअप झाल्यानंतरही प्रेयसीचा पाठलाग करण्याच्या घटनादेखील नित्याच्याच. मात्र, एका साध्या सरळ तरुणीच्या दुकानात शिरून तिचा विनयभंग केल्याची घटना येथे घडली. चक्क ‘तू कॉल गर्ल आहेस का, अशी विचारणा करून आपल्याला एका मुलीची आवश्यकता असल्याची निर्लज्ज बतावणी आरोपीने केली.
तालुक्यातील एक २७ वर्षीय तरुणी एका ठिकाणी कलाकुसरीचे धडे देते. ती १६ ऑगस्ट रोजी दुपारी ४ ते ४.३० च्या सुमारास तेथे हजर असताना आरोपी पवन दाढे (२७, रा. फुबगाव) हा तिच्या दुकानात शिरला. त्याने अतिशय निर्लज्ज भाषेत शरीरसुखासाठी त्याला मुलीची आवश्यकता असल्याचे पीडिताला सांगितले. या अचानक घडलेल्या घटनेने ती तरुणी नखशिकांत हादरली. उपस्थित तरुणी, महिलांनी तिला धीर दिला. घटनेबाबत पोलीस तक्रार नोंदविण्यात आली. नांदगाव खंडेश्वर पोलिसांनी १७ ऑगस्ट रोजी सायंकाळच्या सुमारास आरोपी पवन दाढे याच्याविरूद्ध कलम ४५१, ३५४ (आय), (१) (२) अन्वये गुन्हा दाखल केला.
कोट
गुन्हा दाखल झाल्याबरोबर आरोपीच्या शोधार्थ पथक पाठविण्यात आले. मात्र, तो घरी आढळून आला नाही. आरोपीचा लवकरच अटक करण्यात येईल.
- हेमंत ठाकरे,
ठाणेदार, नांदगाव खंडेश्वर