अमरावती : बहुचर्चित शारदानगरातील चार वर्षीय अपहरण प्रकरणात अमरावती व अहमदनगर गुन्हे शाखेच्या पथकाने संयुक्त कारवाई करून आणखी एका महिला आरोपीला अटक केली. त्यानंतर अधिक तपासाकरिता तिला राजापेठ पोलिसांच्या ताब्यात देण्यात आले आहे.
जया सचिन हिंगे (४२, रा. कोठला अहमदनगर) असे महिला आरोपीचे नाव आहे. तिला बुधवारी न्यायालयासमोर हजर केले असता, न्यायालयाने ६ मार्चपर्यंत पोलीस कोठडी सुनावली. अन्य सात आरोपींचा पीसीआर ६ मार्च रोजी संपुष्टात येणार आहे. आतापर्यंत अहमदनगरहून सात, तर अमरावतीच्या शारदानगर येथून मुलाच्या दादीला पोलिसांनी अटक केली आहे. म्हणजे आता पोलीस कोठडीत असलेल्या आरोपींची संख्या आठ झाली आहे.
बॉक्स
टकलू, अज्जू फरारच
या प्रकरणाचा मास्टर माईंड इसार टकलू व त्याचा साथीदार पुणे येथील अजीज अज्जू हा अद्यापही फरारच असून, पोलीस त्याच्या मागावर आहे. मास्टर माईंड टकलूच्या पत्नी रुखसार शेखला तीन दिवसांपूर्वीच अहमदनगर येथून अटक करण्यात आली होती. आता जया हिंगेला अटक करण्यात आल्यामुळे तिच्याकडूनसुद्धा या प्रकरणाचे आणखी धागेदोर उलगडण्यास मदत होेणार असल्याचे पोलिसांनी सांगितले.
बॉक्स:
जया दादी व हिनाची मैत्रिण
चार वर्षीय मुलाच्या दादीचे माहेर हे अहमदनगर आहे. ज्या परिसरात दादी राहायची, त्या ठिकाणी हिना शेख व जया हिंगे यासुद्धा राहत होत्या. हिना शेख व जया हिंगे ही लोकांच्या घरी स्वयंपाक करण्याचे काम करीत होती. तेव्हापासून मोनिका म्हणजेच मुलाची दादी हिच्याशी जयाची ओळख होती. मुलाचे अपहरण केल्यानंतर मुलाला कुठे ठेवाचे हे जया दादी व हिनाला सांगणार होती, असे पोलिसांच्या तपासात पुढे आले आहे. त्यामुळे जयाला अटक करण्यात आल्याची पोलीस आयुक्त आरती सिंह यांनी दिली.