अमरावती : वाढत्या उन्हाच्या तडाख्याबरोबरच पाणीटंचाईची तीव्रता गंभीर होत आहे. यात जिल्ह्यातील ४७ गावांत ५३ विहिरी अधिग्रहित करून पाणीपुरवठा केला जात आहे. चिखलदऱ्यात ८ व चांदूर रेल्वे तालुक्यात १ अशा ९ गावांना टँकरव्दारे पाणीपुरवठा केला जात आहे.
गतवर्षी पाऊस चांगला झाल्यामुळे पाणीपुरवठ्याच्या जलस्रोत यंदा मुबलक प्रमाणात असल्याने अनेक तालुक्यात गतवर्षीच्या तुलनेत यंदा पाणीटंचाईची झळ कमी गावांना सोसावी लागण्याची शक्यता वर्तविली जात होती. मात्र, ग्रामीण भागात पाणीटंचाईने डोके वर काढले आहे. जिल्ह्यातील काही गावांमध्ये तीव्र पाणीटंचाई उद्भवली आहे. या गावांना पाणीपुरवठा होणाऱ्या जलस्रोताने तळ गाठला आहे. परिणामी प्रशासनाने आजघडीला १४ पैकी ८ तालुक्यांतील ४७ गावांत मार्च व एप्रिल महिन्यापासून ५३ विहिरी व बोअरचे अधिग्रहण करून गावाला पाणीपुरवठा केला जात आहे. अधिग्रहित विहिरी व बोअरवरून या गावांना पाणीपुरवठा सुरू असल्याने ग्रामस्थांना तूर्तास दिलासा मिळाला आहे. शहरात देखील एक ते दोन दिवसांआड पाणीपुरवठा होत आहे. शहरी भागापेक्षा ग्रामीण भागात पाणीटंचाईची तीव्रता अधिक आहे. संभाव्य पाणीटंचाई पाहता त्यावर मात करण्यासाठी उपाययोजना करण्यात आल्या आहेत. यात सध्याच्या स्थितीत पाणीटंचाईच्या झळा सोसणाऱ्या ९ गावांची तहान भागविण्यासाठी टँकर सुरू करण्यात आले आहेत. याशिवाय ४७ गावांना पाणीटंचाईचा सामना करावा लागत आहे. या अनुषंगाने ग्रामपंचायतींनी प्रस्ताव सादर करताच पंचायत समितीच्यावतीने विहिरी व बोअरवेलच्या अधिग्रहणाची कारवाई केली आहे.
बॉक्स
विहीर, बोअरचे अधिग्रहण झालेली गावे
नांदगाव खंडेश्र्वर तालुक्यातील शिवरा, शेलूगुंड, पळसमंडळ, नागझरी, बोपी, पिंपरी गावंडा, वेणी गणेशपूर, चिखलदरा तालुक्यातील एकझिरा, लवादा, आकी, हतरू, अमरावती तालुक्यातील भानखेडा, मोगरा, कस्तुरा, यावली अंतर्गत नरसिंगपूर, इंदला मौजे घातखेडा, बोडणा(परसोडा)देवरा, पिंपळखुटा, भानखेड खु., धानोरा कोकाटे, चांदूर रेल्वे तालुक्यातील सावंगा विठोबा, नया सावंगा, निमला, अमदोरी, टेंभुर्णी, सावंगी मग्रापूर, साेनगाव, बग्गी जहागीरपूर, शिरजगाव कोरडे, भातकुलीमधील दाढी पेढी, अचलपूर तालुक्यातील बोर्डी, वाल्मिकपूर, खतीजापूर, कासमपूर, कुंभी वाघोली, कुष्ठा बु., परसापूर, बोरगाव दोरी, वरूडमधील वडाळा, मोर्शी रिध्दपूर, कोळविहीर, गोराळा, आष्टोली, खोपडा, दाभेरी आदी गावांमध्ये विहीर व बोअरचे अधिग्रहण करण्यात आले आहे.
बॉक्स
९ गावांना टँकरने पाणीपुरवठा
मेळघाटातील चिखलदरा तालुक्यात आजघडीला एकझिरा, लवादा, आकी, सोमवारखेडा, मलकापूर, मोथा, धरमडोह, बहादरपूर यासह चांदूर रेल्वे तालुक्यातील सावंगी मग्रापूर अशा ९ गावांत पाणीपुरवठ्याची समस्या तीव्र झाली असल्याने या ठिकाणी टँकरव्दारे पाण्याचा पुरवठा केला जात आहे.