अमरावती : सक्करसाथ परिसरातील जय ट्रेडर्स नावाचे दुकान फोडून ४२,३१२ रुपयांचे तेलाचे डब्बे चोरी करणाऱ्या एका आरोपीला खोलापुरी गेट पोलिसांनी २४ तासात गजाआड केले. आकाश साबसिंग सागर (मोकळे) (२२ रा. खरकाडीपुरा) असे आरोपीचे नाव आहे. त्याच्या ताब्यातून ६३,९३० रुपयांचा मुद्देमाल जप्त करण्यात आला आहे.
सुधीर जयकिशन सोमानी (४६,रा. दुर्वाकर सोसायटी, महेशनगर) यांचा होलसेल दुकान असून, ते २३ जून रोजी दुकान उघडण्यासाठी गेले असता, दुकानाचे शटर वाकलेले दिसले. पाहणी केली असता, विविध कंपन्यांचे तेलाचे डब्बे गायब झाल्याचे लक्षात आले. तक्रारीवरून खोलापुरी गेट पोलिसांनी अज्ञाताविरुध्द गुन्हा नोंदविला. सदर गुन्ह्याच्या तपासात पोलिसांनी गोपनीय माहिती काढली असता, पोलीस रेकॉर्डवरील आरोपी आकाश सागर याचे नाव पुढे आले. पोलिसांनी त्याला ताब्यात घेऊन चौकशी केली असता, त्याने त्याच्या साथीदारासह ही चोरी केल्याची कबुली दिली. ही कारवाई पोलीस आयुक्त आरती सिंह, पोलीस उपायुक्त शशीकांत सातव, एसीपी भारत गायकवाड यांच्या मार्गदर्शनात पोलीस निरीक्षक गजानन तामटे, पीएसआय बालाजी वळसणे यांच्यासह पथकाने केली.