अकोला: सर्वोच्च न्यायालयाच्या आदेशानुसार नागरिकांचा मागासर्व प्रवर्गाच्या (ओबीसी) जिल्हा परिषदेच्या १४ आणि जिल्ह्यातील सात पंचायत समित्यांच्या २८ जागा रिक्त जागा झाल्या असून, रिक्त झालेल्या जागा सर्वसाधारण प्रवर्गातून भरण्यात येणार आहेत. त्यानुषंगाने रिक्त जागांसाठी सर्वसाधारण महिला प्रवर्गाच्या आरक्षणाची सोडत मंगळवार, २३ मार्च रोजी काढण्यात आली. जिल्हा परिषदेच्या रिक्त जागांचे आरक्षण जिल्हाधिकारी कार्यालयातील नियोजन सभागृहात आणि पंचायत समित्यांच्या रिक्त जागांचे आरक्षण जिल्ह्यातील सातही तहसील कार्यालयांत जाहीर करण्यात आले. त्यामध्ये जिल्हा परिषदेच्या रिक्त १४ जागांपैकी ७ जागा सर्वसाधारण महिला प्रवर्गासाठी राखीव जाहीर करण्यात आल्या.
गतवर्षी जानेवारी महिन्यात घेण्यात आलेल्या जिल्हा परिषद व पंचायत समित्यांच्या सार्वत्रिक निवडणुकीत देण्यात आलेले प्रवर्गनिहाय आरक्षण ५० टक्क्यापेक्षा जास्त झाल्याने, नागरिकांचा मागासवर्ग प्रवर्गातून निवडून आलेल्या संबंधित सदस्यांचे सदस्यत्व रद्द करुन, पुन्हा निवडणूक घेण्याचा आदेश सर्वोच्च न्यायालयाने ५ मार्च रोजी दिला. त्यानुसार ‘ओबीसी’ प्रवर्गातून निवडून आलेल्या जिल्हा परिषदेच्या १४ सदस्यांचे आणि जिल्ह्यात सात पंचायत समित्यांच्या २८ सदस्यांचे सदस्यत्व रद्द झाले. त्यामुळे जिल्हा परिषद आणि पंचायत समित्यांच्या रिक्त झालेल्या जागा सर्वसाधारण प्रवर्गातून भरण्यात येणार आहेत. त्यासाठी राज्य निवडणूक आयोगाने दिलेल्या आदेशानुसार जिल्हा परिषदेच्या रिक्त १४ जागा आणि सात पंचायत समित्यांच्या रिक्त २८ जागांसाठी सर्वसाधारण महिला प्रवर्गाच्या आरक्षणाची सोडत २३ मार्च रोजी काढण्यात आली. जिल्हा परिषदेच्या रिक्त जागांसाठी सर्वसाधारण महिला प्रवर्गाच्या आरक्षणाची सोडत जिल्हाधिकारी कार्यालयातील नियोजन सभागृहात काढण्यात आली. त्यामध्ये जिल्हा परिषदेच्या रिक्त १४ जागांपैकी ७ जागा सर्वसाधारण महिला प्रवर्गासाठी आरक्षित जाहीर करण्यात आल्या असून, उर्वरित ७ जागा सर्वसाधारण प्रवर्गासाठी निश्चित करण्यात आल्या. जिल्हाधिकारी जितेंद्र पापळकर, निवासी उपजिल्हाधिकारी संजय खडसे यांच्या प्रमुख उपस्थितीत आरक्षण जाहीर करण्यात आले. तसेच जिल्ह्यातील सात पंचायत समित्यांच्या रिक्त २८ जागांसाठी सर्वसाधारण महिला प्रवर्गाच्या आरक्षणाची सोडत सातही तहसील कार्यालयांमध्ये जाहीर करण्यात आली.
जि.प.च्या १४ जागांचे गट व
प्रवर्गनिहाय असे आहे आरक्षण!
गट प्रवर्ग
दानापूर सर्वसाधारण
अडगाव बु. सर्वसाधारण स्त्री
अकोलखेड सर्वसाधारण
तळेगाव बु. सर्वसाधारण स्त्री
कुटासा सर्वसाधारण स्त्री
लाखपूरी सर्वसाधारण
बपोरी सर्वसाधारण स्त्री
घुसर सर्वसाधारण
कुरणखेड सर्वसाधारण
कानशिवणी सर्वसाधारण स्त्री
अंदुरा सर्वसाधारण स्त्री
देगांव सर्वसाधारण
दगडपारवा सर्वसाधारण स्त्री
शिर्ला सर्वसाधारण
इश्वर चिठ्ठीने अंदूरा, कानशिवणी
सर्वसाधारण महिलांसाठी राखीव!
जिल्हा परिषदेच्या रिक्त जागांसाठी सर्वसाधारण महिला प्रवर्गाच्या आरक्षण सोडतमध्ये अंदुरा, कानशिवणी व घुसर या तीन जागांसाठी इश्वर चिठ्ठी काढण्यात आली. त्यामध्ये इश्वर चिठ्ठीने अंदूरा व कानशिवणी या दोन जागा सर्वसाधारण महिला प्रवर्गासाठी राखीव जाहीर करण्यात आल्या.