वाईनबारमधून युवकाची रोकड लंपास

रेल्वे स्टेशन चौक परिसरातील घटना.

अकोला: रेल्वे स्टेशन चौक परिसरातील एका वाईनबारमध्ये मद्यप्राशन करण्यासाठी गेलेल्या युवकाच्या खिशातील ५0 हजार रुपयांची रोकड लंपास झाल्याची घटना मंगळवारी सायंकाळी घडली. याप्रकरणी रात्री उशिरापर्यंत रामदासपेठ पोलिसांनी गुन्हा दाखल केला नव्हता. मयूर नामक युवक स्टेशन चौकातील एका वाईनबारमध्ये मंगळवारी सायंकाळी मद्यप्राशन करण्यासाठी गेला. त्याच्याकडे अँडमिशनसाठी आणलेली ५0 हजार रुपयांची रोकड होती. वाईनबारमध्ये मद्यप्राशन केल्यानंतर त्याला खिशात असलेली ५0 हजार रुपयांची रोकड दिसून आली नाही. त्यामुळे त्याने रामदासपेठ पोलीस ठाण्यात धाव घेतली; परंतु रात्री उशिरापर्यंत पोलिसांनी त्याची तक्रार नोंदवून घेतली नाही. शहरात लुटमारीच्या घटनांमध्ये वाढ झाली आहे. नुकतेच एका व्यापार्‍याचे साडे तीन लाख रुपये लुटण्यात आले होते. त्यानंतर ही घटना घडली.