खदान पोलीस स्टेशनअंतर्गत येणाऱ्या कपिलावस्तू नगरजवळील चैतन्य कॉलनीमधील रहिवासी विवेक काकड यांची पत्नी संगीता काकड (४५) गुुरुवारी दुपारी १२ वाजता त्यांच्या घरासमोरील दरवाजाजवळ उभ्या होत्या. त्यावेळी तेथे दुचाकी वाहनावरून दोन युवक आले. यातील एक जण महिलेजवळ चिठ्ठी घेऊन आला आणि पत्ता विचारला. यावेळी संगीता काकड या चिठ्ठीवरील पत्ता बघत असताना अचानक त्या युवकाने त्यांच्या गळ्यातील दीड तोळ्याचे सोन्याचे मंगळसूत्र ओढले व दुचाकीवरून फरार झाला. खदान पोलिसांनी गुन्हा दाखल करून काळ्या रंगाच्या दुचाकीचा शोध सुरू केला आहे.
कुरिअरची वाट बघताना घडली घटना
सूत्रानुसार गुरुवारी काकड कुटुंबीयांचे कुरिअरच्या माध्यमातून काही सामान येणार होते. कुरिअर बॉयने संगीता काकड यांना फोनवरून संपर्क करून त्यांच्या घरासमोर उभे राहण्यासाठी सांगितले होते. जेणेकरून त्याला काकड यांच्यापर्यंत सहजतेने पोहचून सामान देता येईल. संगीता काकड या कुरिअरने येणाऱ्या सामानाच्या प्रतीक्षेत घरासमोर उभ्या होत्या. दरम्यान, पाळत ठेवून असलेल्या दुचाकीवरील युवकांनी हीच संधी साधली.
वृद्ध महिलेच्या सतर्कतेने वाचले मंगळसूत्र
गौरक्षण रोडवरील नित्यानंदनगर परिसरातील भोले किराणाजवळदेखील बुधवारी उशिरा रात्री असाच प्रयत्न झाला. ७२ वर्षीय विजया बाळासाहेब कुकडे या बुधवारी उशिरा रात्री भोले किराणाजवळून जात होत्या. त्यावेळी त्यांच्याजवळ दुचाकीवर दोन युवक आले. त्यामधील एकाने पत्ता विचारण्याच्या बहाण्याने त्यांच्या गळ्यातील मंगळसूत्र ओढण्याचा प्रयत्न केला; मात्र यावेळी महिलेने मंगळसूत्राला घट्ट पकडून ठेवले, त्यामुळे युवक मंगळसूत्र तोडण्यास अयशस्वी ठरले आणि दोघे फरार झाले.
अज्ञात व्यक्तीपासून सावध रहा!
खदान ठाण्यांतर्गत येणाऱ्या दोन परिसरातील चेनस्नॅचिंगच्या घटना पाहता गस्त वाढविण्यात आली आहे. नागरिकांनी सतर्क राहण्याचे आवाहन करण्यात येत आहे. एखादा अज्ञात व्यक्ती कोण्या कारणाने जवळ येत असेल अथवा बोलविण्याचा प्रयत्न करीत असेल तर महिलांनी त्याला दूर ठेवण्याचा प्रयत्न करावा. सकाळी व सायंकाळी फिरणाऱ्या महिलांनीही सावध राहावे.
- जी.श्रीधर, पोलीस अधीक्षक