कार बक्षीस लागल्याची बतावणी करून महिलेची फसवणूक

पातूर येथील घटना; झारखंडमधील इसमाविरुद्ध गुन्हा दाखल.

पातूर (अकोला) : टीव्ही चॅनेलवरील चेहरा ओळखा स्पर्धेत चेहरा ओळखला; टाटा कंपनीची कार बक्षीस लागली असल्याची बतावणी करून झारखंडमधील एका इसमाने पातूर शहरातील एका महिलेची १२ हजार रुपयांनी फसवणूक केल्याची घटना १७ ते १९ डिसेंबर दरम्यान घडली. याप्रकरणी सदर महिलेच्या फिर्यादीवरुन पातूर पोलिसांनी मंगळवार, २३ डिसेंबर रोजी आरोपीविरुद्ध गुन्हा दाखल केला आहे. पातूर येथील दीपाली पोहरे या महिलेने एका टीव्ही चॅनेलवरील ह्यचेहरा ओळखाह्ण स्पर्धेत भाग घेतला होता. त्यानंतर त्यांना १७ डिसेंबर रोजी मोबाइलवरून एका इसमाने संपर्क साधला. त्याने सदर स्पर्धेमध्ये त्यांना टाटा कंपनीची कार बक्षीस लागली असल्याचे सांगितले तसेच ती बक्षीस म्हणून लागलेली कार मिळविण्यासाठी १२ हजार रुपयांची रक्कम त्याने सांगितलेल्या बँक खात्यात जमा करण्यास सांगितले. सदर महिलेने त्या इसमाने दिलेली माहिती खरीच असल्याचे समजून सांगितलेल्या बँक खात्यात १२ हजार रुपयांची रक्कम जमा केली. ही घटना १९ डिसेंबरला घडली. परंतु, १२ हजार रुपयांची रक्कम भरूनही त्यांना टाटा कंपनीची कार मिळाली नाही. त्यामुळे आपली फसवणूक झाली असल्याचे त्यांच्या लक्षात आले. यानंतर दीपाली पोहरे यांनी घडलेल्या प्रकाराबाबत पातूर पोलीस ठाण्यात २३ डिसेंबर रोजी फिर्याद दाखल केली. त्यावरून पोलिसांनी जोगेश्‍वर देहुरे रा. लक्ष्मी एंटरप्रायझेस , आधारशीला कॉम्प्लेक्स, झारखंड या इसमाविरुद्ध भादंविच्या कलम ४२0 अन्वये गुन्हा दाखल केला आहे. पातूर येथे यापूर्वी बँकेचा एटीएम क्रमांक व पासवर्ड विचारून बँक ग्राहकाच्या खात्यातून पैसे काढून फसवणूक केल्याच्या दोन घडना घडल्या आहेत.