अकोला : जीवघेण्या कोरोना विषाणूच्या काळात स्वतःचा व कुटुंबीयांचा जीव धोक्यात घालून वार्तांकन करणाऱ्या शहरातील पत्रकारांना फ्रंटलाईन वर्करच्या निकषात का बसविले जात नाही, असा सवाल उपस्थित करून याबाबत जिल्हाधिकारी जितेंद्र पापळकर यांनी भूमिका स्पष्ट करावी, अशी मागणी भाजपचे ज्येष्ठ आमदार गोवर्धन शर्मा यांनी मंगळवारी पत्राद्वारे केली आहे. इतर राज्यांसह औरंगाबाद, जळगाव, खान्देश, नागपुरात पत्रकारांना फ्रंटलाइन वर्करच्या निकषांमध्ये बसवून त्यांच्या लसीकरणासाठी प्रशासकीय यंत्रणांनी पुढाकार घेतला आहे. अशास्थितीत जीव धोक्यात घालून वार्तांकन करणाऱ्या शहरातील सर्व पत्रकारांचा व त्यांच्या कुटुंबीयांचा फ्रंटलाइन वर्करच्या निकषांमध्ये जिल्हाधिकारी जितेंद्र पापळकर का समावेश करीत नाहीत, असा थेट सवाल शर्मा यांनी उपस्थित केला आहे.
महापौरांच्या पत्राला अद्यापही उत्तर नाहीच!
शहरातील सर्व पत्रकारांचे व त्यांच्या कुटुंबीयांचे तातडीने लसीकरण करावे, अशी मागणी महापौर अर्चना मसने यांनी जिल्हाधिकाऱ्यांकडे पत्राद्वारे केली होती. या पत्राला सहा दिवसांचा कालावधी उलटून गेला असला तरीही अद्यापपर्यंत जिल्हा प्रशासनाकडून कोणतेही उत्तर देण्यात आले नाही.