विदर्भात शेतक-यांचे कृषी प्रक्रिया प्रकल्प उभारण्यावर भर!

शेतकरी उत्पादक गट, कंपन्यांचे मागवले प्रस्ताव; ५0 टक्के अनुदान मिळणार.

अकोला : खेड्यातच कृषिमालावर आधारित प्रक्रिया प्रकल्प उभारण्यासाठी शेतकर्‍यांना प्रोत्साहन दिले जात असून, यंदाही कृषी उद्योजक गट प्रकल्पांतर्गत निवडलेल्या विदर्भातील शेतकरी उत्पादक गट, कंपन्यांचे प्रस्ताव कृषी तंत्रज्ञान व्यवस्थापन यंत्रणेमार्फत (आत्मा) मागविण्यात आले आहेत. या योजनेत शेतकरी गटांना ५0 टक्के अनुदान देण्यात येणार आहे. जागतिक बँकेच्या अर्थसहाय्यातून राज्यात आत्मा यंत्रणेमार्फत गत पाच वर्षांपासून स्पर्धाक्षम कृषी विकास प्रकल्प राबविण्यात येत आहे. या प्रकल्पांतर्गत कृषी उद्योजकता विकास कार्यक्रमावर जोर देण्यात आला आहे. यात मुख्यत्वे पीक उत्पादनात वाढ, उत्पादकता वाढ व वाढीव बाजाराच्या संधी शेतकर्‍यांना उपलब्ध करू न देण्यात येत आहेत. या प्रकल्पाच्या माध्यमातून २0१५-१६ यावर्षी हा कार्यक्रम राबविण्यात येत असून, याकरिता कृषी उद्योजक गट या प्रकल्पांतर्गत निवडलेल्या कार्यक्षेत्रातील शेतकरी सहकारी संस्था, शेतकरी उत्पादक गट व शेतकरी उत्पादक कंपनी यांना प्रकल्प उभारण्यासाठी प्रोत्साहन दिले जात आहे. कृषी उद्योजक गटामार्फत निवडलेल्या शेतकरी गट, शेतकरी सहकारी संस्था, शेतकरी कंपनीच्या लाभार्थींना कापणीपश्‍चात तंत्रज्ञान व्यवस्थापन, धान्य व फळे प्रकल्प, मूल्यवर्धन व प्रक्रिया, प्रतवारी व पणन प्रकल्प, तसेच कृषी मूल्यवर्धनासाठी यांत्रिकीकरण, कृषी व्यवसायाला प्रोत्साहन देण्यासाठी विविध उपक्रम, बाजाराभिमुख सेंद्रिय कृषी उत्पादन, प्रतवारी व पणन विकासाला प्रोत्साहन देणारे प्रकल्प उभारण्यात येणार आहेत. हे प्रकल्प उभारण्यासाठी लाभार्थींना अहवाल सादर करावा लागणार आहेत. या कृषी उद्योजकता प्रस्तावामधील प्रकल्प उभारणीसाठी लागणारी यंत्र व उपकरणांना अर्थसहाय्य उपलब्ध आहे. यंत्र व उपकरणांसाठी लागणार्‍या खर्चाच्या ५0 टक्के किंवा जास्तीत जास्त १0 लाख रुपये इतके अनुदान शेतकरी गट, शेतकरी सहकारी संस्था, शेतकरी कंपनीच्या लाभार्थींना देण्यात येणार आहे.