उभ्या ऑटोला अज्ञात वाहनाची धडक; एक ठार, एक गंभीर

मूर्तिजापूर येथून माना येथे ८ ते १० प्रवासी घेऊन जात असलेल्या ऑटो क्रमांक एमएच ३० एए १४६८ मधील अचानक वायरिंग जळाल्याने धूर निघाला. चालक राजू चक्रे याने आपले वाहन थांबवून इतर प्रवाशांना खाली उतरवून राजू चक्रे (वय वर्षे २८), अनिल गोपाल कोकणे (वय वर्षे ४८) व दिनेश गंगाधर ढवळे (वय वर्षे ३४) राहणार माना हे तिघे वायरिंग तपासत असताना पाठीमागून येणाऱ्या अज्ञात वाहनाने धडक दिल्याने अनिल गोपाल कोकणे हा ठार झाला तर ऑटोचालक राजू चक्रे हा गंभीररीत्या जखमी झाला आहे. त्याच्यावर अकोला येथे उपचार करण्यात येत आहे तर दिनेश गंगाधर ढवळे हा किरकोळ जखमी झाला आहे. इतर महिला प्रवासी महामार्गाच्या कडेला बसले असल्याने मोठा अनर्थ टळला. धडकेने ऑटो रस्त्याच्या बाजूला असलेल्या खड्ड्यात जाऊन उलटला. दिनेश ढवळे याच्या फिर्यादीवरून शहर पोलिसांनी अज्ञात वाहनाविरुद्ध गुन्हा दाखल केला आहे. पुढील तपास महिला पोलीस उपनिरीक्षक संगीता गावडे, पोलीस कॉन्स्टेबल योगेश उमक करीत आहे.