तहसील कार्यालयानजीकची घटना
अकोला : तहसील कार्यालयाजवळून जात असलेल्या एका दुचाकीस्वार युवकास भरधाव ऑटोने जबर धडक दिल्याची घटना शनिवारी दुपारी घडली. या अपघातात जखमी झालेल्या युवकाचा सर्वोपचार रुग्णालयात उपचारादरम्यान सायंकाळी मृत्यू झाला. याप्रकरणी पोलीस ठाण्यात तक्रार देण्यात आली आहे.
मोहता मिल चाळ परिसरातील मरघट येथील रहिवासी मोहम्मद फैजान शेख असिफ वय १८ वर्षे हा युवक दुचाकीने तहसील कार्यालयाजवळून जात असताना समोरून आलेल्या भरधाव ऑटोने त्याच्या दुचाकीला जबर धडक दिली. या अपघातात गंभीर जखमी झालेल्या युवकावर सर्वोपचार रुग्णालयात उपचार सुरू करण्यात आले. मात्र, शनिवारी सायंकाळच्या सुमारास युवकाचा उपचारादरम्यान मृत्यू झाला. याप्रकरणी पोलीस ठाण्यात तक्रार देण्यात आली आहे.
बेशिस्त ऑटोचालकांचा हैदोस
शहरात अनधिकृतपणे चालणाऱ्या ऑटोची संख्या मोठ्या प्रमाणात आहे. प्रवासी घेण्यासाठी मागील दुचाकीचा विचार न करता कुठेही आणि कसेही थांबणाऱ्या बेशिस्त ऑटोचालकांमुळे अनेक अपघात घडत आहेत. या ऑटोचालकांवर अंकुश मिळविण्यात पोलीस व मनपा प्रशासनाला अद्यापही यश आले नाही. या ऑटोचालकांवर कारवाईची मागणी करण्यात आली आहे.