दोन चिमुकल्यांच्या अपहरणाचा प्रयत्न

बाळापूर रोडवरील एका शिकवणी वर्गातील चिमुकल्यांचे दोन अज्ञात व्यक्तींनी अपहरण करण्याचा प्रयत्न केल्याची घटना.

पातूर(अकोला), दि. २७- शहरातील स्थानिक बाळापूर रोडवरील एका शिकवणी वर्गातील चिमुकल्यांचे दोन अज्ञात व्यक्तींनी अपहरण करण्याचा प्रयत्न केल्याची घटना २७ फेब्रुवारी रोजी रात्री ८.३0 वाजता घडली. मुजावरपुरा येथील अयान खान जब्बार खान व मुद्दसीर अहमद खान मजीद खान हे दोघे शिकवणी वर्गातून घरी येत होते. दरम्यान, मरहबा कॉलनी येथून जात असताना दोन अज्ञात व्यक्तींनी त्यांचा पाठलाग केला. तसेच अयान खान याचे अपहरण करण्याचा प्रयत्न केला; मात्र त्याचा मित्र मुद्दसीर अहमद खान याने वेळीच समयसूचकता दाखवत आरडाओरड केल्याने अपहरणकर्त्यांंनी अयान खान याला सोडून देऊन पळ काढला. या घटनेमुळे शहरात खळबळ उडाली आहे. या प्रकरणी मुजाहीद खान मजीद खान यांच्या तक्रारीवरून पोलिसात गुन्हा दाखल करण्याची प्रक्रिया सुरू होती. या प्रकरणाची तक्रार प्राप्त झाली आहे. या प्रकरणाची चौकशी करून गुन्हा दाखल करण्यात येईल, असे पोलिसांनी सांगितले. दरम्यान, फिर्याद घेण्यासाठी पोलिसांनी टाळाटाळ केल्याचा मुजाहीद खान यांनी आरोप केला आहे. अनेक वेळापर्यंंत पोलीस आपली जबाबदारी नसल्याचे सांगत फिर्याद घेत नसल्याचे टाळत होते, असेही मुजाहीद खान यांनी सांगितले.