संजय उमक
मूर्तिजापूर : तालुक्यातील माना वीज वितरण उपविभागाकडून मान्सूनपूर्व झाडांच्या फांद्या तोडण्याचा कार्यक्रम हाती घेतला आहे; परंतु माना सबस्टेशन अंतर्गत येत असलेल्या माना गावात दि. १८ मे रोजी चार निंबाच्या झाडांची बुडापासून कत्तल केल्याने नागरिकांमध्ये रोष व्यक्त होत आहे. या संदर्भात उपसरपंच मंगेश वानखडे यांनी तहसीलदारांकडे तक्रार दिली आहे.
माना सबस्टेशन अंतर्गत मान्सूनपूर्व काम सुरू आहे. याअंतर्गत झाडांच्या फांद्या न तोडता माना येथे चार कडुनिंबाचे झाड जमीनदोस्त केले. शासन एकीकडे वृक्ष लागवडीची मोहीम युद्धस्तरावर राबवित असताना दुसरीकडे वीज वितरण कंपनीच्या अधिकाऱ्यांकडून विनापरवाना वृक्षांची कत्तल करण्यात येत असल्याने ग्रामस्थांनी नाराजी व्यक्त केली. यासंदर्भात माना वितरण केंद्राचे कनिष्ठ अभियंता कमलेश मस्के यांना व मूर्तिजापूर येथील उपकार्यकारी अभियंता मनोज खांडरे यांना यासंदर्भात अवगत केले असता आम्ही घटनास्थळावर जाऊन पाहिले नाही व याबाबत कल्पना नसल्याचे ‘लोकमत’शी बोलताना सांगितले. यासंदर्भात माना येथील उपसरपंच मंगेश वानखडे यांनी तहसीलदार व पोलीस स्टेशनला वीज वितरण कंपनीविरुद्ध तक्रार दाखल केली आहे. या संदर्भात संबंधित अधिकाऱ्यांवर कारवाई करण्याची मागणी तक्रारीतून केली आहे. (फोटो)
---------------
मान्सूनपूर्व तयारी करताना आम्ही झाडे बुडापासून कधीच तोडत नाही. केवळ झाडाच्या फांद्या छाटल्या जातात. असे झाले असेल तर त्याची चौकशी करण्यात येईल.
- मनोज खांडरे, उपकार्यकारी अभियंता, वीज वितरण कंपनी, मूर्तिजापूर
--------------------
वृक्ष तोडण्यासाठी ग्रामपंचायतची आणि वनविभागाची परवानगी घेणे अपेक्षित होती. तलाठी, मंडळ अधिकारी यांचा पंचनाम्यासह अहवाल मागवून वरिष्ठ कार्यालयात सादर करण्यात येईल.
- प्रदीप पवार
तहसीलदार, मूर्तिजापूर